Սարալանջի կրակոցների գործով փորձել են 19-ամյա աղջկա ձերբակալել. ինչի՞ց են սկսվել կրակոցները (տեսանյութ)

Դեկտեմբերի 10-ին կրակոցներ էին հնչել Երևանում։ Կրակոցների ընթացքում նշված վայրով անցնող Արաբկիր և Քանաքեռ-Զեյթուն վարչական շրջանների ավագ դատախազը, վտանգելով կյանքը, իր ավտոմեքենան կանգնեցրել է ռուսական համարանիշներով ավտոմեքենայի առաջ, որի միջից էլ հենց կրակոցներ են արձակվել, որպեսզի վարորդը չդիմի փախուստի։ Սակայն վարորդը, ով երիտասարդ տղա էր, ավտոմեքենան քշել է ոչ միայն դատախազի, այլև ֆոտոլրագրող Գագիկ Շամշյանի ուղղությամբ և երբ հորդորվել էր, որ դեպքի վայրից չհեռանա, նա դիմել է փախուստի։

Փախուստի են դիմել ևս 2-3 ավտոմեքենաներ։ Նշված ավտոմեքենաներից երկուսի համարանիշներն արդեն իրավապահներն ունեն։

ArmLur.am-ին հայտնի է դարձել, թե ինչից են սկսվել կրակոցները:

ArmLur.am-ին հասած տեղեկությունների համաձայն՝ Սարալանջում հարվածել են ռուսական համարանիշներով ավտոմեքենային, որից հետո սկսվել է վիճաբանություն։ Մի խումբ երիտասարդներ դիմակավորված ծեծի են ենթարկել վարորդին։ Վերջինս փորձել է փախչել իր վրա հարձակված մարդկանցից, ու այդ պահին նշված վայրով անցնող Արաբկիր և Քանաքեռ-Զեյթուն վարչական շրջանների ավագ դատախազը ավտոմեքենան կանգնեցրել է ռուսական համարանիշներով ավտոմեքենայի առաջ, որ երիտասարդը չփախչի:

Ըստ ArmLur.am-ին հասած տեղեկությունների՝ երիտասարդը փախչելուց հետո գնացել է հիվանդանոց, քանի որ իրեն դաժանաբար ծեծի են ենթարկել:

Այս պատմության մեջ ուշագրավն այն է, որ երիտասարդին իրավապահները տուժող են ճանաչել, սակայն ձերբակալել են նրա հորը, ով որդու դեմ հրաժարվել է ցուցմունք տալ։ Ավելին՝ փորձել են ձերբակալել փախուստի դիմած վարորդի 19-ամյա նշանածին, սակայն պաշտպանների միջամտության արդյունքում այն չի իրականացվել:

Մանրամասները՝ տեսանյութում։