Թուրքիան և Ադրբեջանն ակտիվացնում են իրենց ճնշումները

Մինչ Նիկոլ Փաշինյանը վատ ներկայացում է բեմադրում Հայաստանում՝ փորձելով նախկին նախագահներին ներքաշել իր կեղտոտ խաղերում, Թուրքիան և Ադրբեջանն ակտիվացնում են իրենց ճնշումները Հայաստանի դեմ։ Նախօրեին հեռախոսազրույց է կայացել Ադրբեջանի և Թուրքիայի նախագահների միջև: Ըստ պաշտոնական Բաքվի՝ Իլհամ Ալիևը և Ռեջեփ Էրդողանն ի թիվս այլ հարցերի, քննարկել են նաև հայ-ադրբեջանական հարաբերությունների կարգավորման գործընթացը։

Ռեջեփ Էրդողանն ասել է, թե ինքն ուշադրությամբ հետևում է խաղաղության շուրջ բանակցություններին և ակնկալում է, որ այն կլինի վերջնական՝ «կայուն խաղաղություն և բարգավաճում բերելով Հարավային Կովկասին»։ Ընդ որում, վերջին անգամ երկու երկրների ղեկավարները շփվել էին երկու շաբաթ առաջ։

Թշնամական երկու պետությունների թիրախում նախկինի պես, այսպես կոչված, «Զանգեզուրի միջանցքն» է։ Թուրքիայի տրանսպորտի նախարար Աբդուլքադիր Ուրալօղլուն հայտարարել է, թե շարունակում են Ադրբեջանի հետ քննարկումներն այսպես կոչված «Զանգեզուրի միջանցքի» վերաբերյալ։ Տրանսպորտային միջանցքները կամրապնդեն միջմայրցամաքային կապերը և կբարձրացնեն տարանցիկ փոխադրումների լոգիստիկ արդյունավետությունը, նշել է Ուրալօղլուն՝ կրկին շեշտելով «Զանգեզուրի միջանցքի» կարևորությունը: «Անկարան ցանկանում է տարածաշրջանում հզոր դերակատար լինել, ասել է թուրք նախարարն՝ ընդգծելով «Թուրքիայի դարի» իրենց տեսլականը։ Թուրքիան աշխատում է Միջին միջանցքի արդյունավետությունը բարձրացնելու ուղղությամբ՝ Բաքու-Թբիլիսի-Կարս երկաթուղային գծից մինչև Զանգեզուրի միջանցք», - ասել է թուրք նախարարը։

Դեկտեմբերի սկզբին Թուրքիայի խորհրդարանի միջազգային հարաբերությունների հարցերով հանձնաժողովի նախագահ Ֆուաթ Օքթայը Բաքվում հայտարարեց, թե «Զանգեզուրյան միջանցքի» բացումը խաղաղության հաստատման կարևոր պայման է։

Վարդուհի Գրիգորյան