Մի շարք դպրոցներ անցել են հեռավար ուսուցման

Հանրապետության տարածքում կան դպրոցներ, որոնք Սուր շնչառական վարակներներով պայմանավորված, անցել են հեռավար ուսուցման։ Այդ դպրոցներից հինգը Լոռու մարզում են, մեկը՝ Տավուշի։ Այդ մասին MediaHub-ի հետ զրույցում ասաց ՀՀ ԱՆ ՀՎԿԱԿ-ի վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանը։

Նրա խոսքով՝ այդ դպրոցներում ՍՇՎ-ների պատճառով բացակայությունների թիվը գերազանցել է 25%-ը։

«Այս պահին ունենք ՍՇՎ-ների ակտիվություն, ինչը բնորոշ է այս սեզոնին։ Ընդհանուր առմամբ հիվանդացության մակարդակն այս ժամանակահատվածում նախորդ տարվա համեմատ 1,1 անգամ ցածր է, այսինքն՝ դեպքերի նվազում ունենք»,- նկատեց նա։

Ռոմելլա Աբովյանը տեղեկացրեց, որ դեպքերի թվի արտառոց աճ, որը կարող է լուրջ անհանգստություն առաջացնել, չկա։ 

«ՍՇՎ-ի սեզոն է, ուստի կանխատեսելի էր այս ամենը։ Մենք հոկտեմբերի մեկից ուժեղացված հսկողություն էինք իրականացնում, դպրոցներում ջերմաստիճանի, ՍՇՎ-ով երեխաների թվի ամենօրյա մոնիթորինգ ենք արել և անում»,- նշեց Աբովյանը։

Նա տեղեկացրեց, որ այս պահին Հայաստանում տարածված են H1N1 և RSV վիրուսները, որոնք հիմնականում երեխաների ու մեծահասակների շրջանում են տարածված։

Ինչ վերաբերում է թոքաբորբի աճող թվերին, ապա Ռոմելլա Աբովյանն ասաց, որ այդ դեպքերը մեծամասամբ կապված են H1N1-ի հետ, երբ մարդիկ տանը երկար ժամանակ պառկում են, սակայն չեն կարողանում հաղթահարել հիվանդությունը, այն տանում է դեպի թոքաբորբ։ Եվ այս շրջանում հոսպիտալացումների մեծ մասն էլ հենց այդ դեպքերով է պայմանավորված։

«Դրա համար մենք հորդորում ենք՝ վիրուսի նախանշանների դեպքում միանգամից դիմել բուժօգնության»,- ամփոփեց խոսքն ԱՆ ՀՎԿԱԿ-ի վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանը։

Նարե Գնունի


Հետևեք մեզ՝ այստեղ