Որպեսզի բոլորը հայտարարագիր լրացնեն, ամսական միջինն անհամեմատ ավելի շատ մարդ պիտի հայտարարագրի, քան ամբողջ 2023 թվականին լրացրածները միասին. «Փաստ»

«Փաստ» օրաթերթը գրում է.

Քանի օր է՝ քպական պաշտոնյաները թմբկահարում են, թե 2024 թվականի համար հայտարարագիր լրացրած արդեն իսկ 3732 քաղաքացի օգտվել է սոցիալական ծախսի փոխհատուցման հնարավորությունից, ու նրանց վերադարձվել է 340 մլն ՀՀ դրամ: Հասկանալի է՝ հաշվի առնելով այն հանգամանքը, որ կառավարությունը ակնհայտորեն ձախողել է համընդհանուր հայտարարագրման համակարգը, դժվարություններ է ստեղծել քաղաքացիների համար, իսկ համակարգն ինքնին քաղաքացիների կողմից ընկալվում է որպես իրենց գրպանը մտնելու հերթական քայլ, փորձ է արվում ապացուցել, թե իրականում պետությունը «ինչ-որ բան է դրել քաղաքացու գրպանը»:

Նշվում է նաև, որ անցած տարի հայտարարագիր է ներկայացրել մոտ 59 հազար մարդ, իսկ այս տարի՝ արդեն մոտ 4500: Իրականում վերջին թվի հետ կապված «արդեն» արտահայտությունը տեղին չէ: Որպեսզի մինչև նոյեմբերի 1-ը հայտարարագիր ներկայացնեն հայտարարագիր ներկայացնելու պարտավորություն ունեցող բոլոր անձինք, ամսական հայտարարագիր պետք է ներկայացնի մոտ 75 հազար քաղաքացի, այսինքն՝ անհամեմատ ավելի շատ, քան ամբողջ 2023 թվականին: Ըստ այդմ, առաջին մեկ ամսում հայտարարագիր ներկայացրածների թիվը՝ մոտ 4500, պարզապես չնչին ցուցանիշ է: Եթե նույնիսկ հաշվի առնենք, որ ընթացքում այդ թիվը կարող է աճել, ասենք, թեկուզ 3-4 անգամ, ապա լավագույն դեպքում մինչև նոյեմբերի 1-ը հայտարարագիր կլրացնի մոտ 150 հազար քաղաքացի, այսինքն՝ մոտ 15-20 տոկոսը: Առավել ևս, եթե հաշվի ենք առնում, որ քաղաքացիների զգալի մասը, կարծես թե, որոշում ունի բոյկոտել համընդհանուր հայտարարագրման համակարգը:

Մյուս կողմից՝ ինչպես տեղեկացրել ենք, եթե առաջիկա կարճ ժամանակամիջոցում այդ համակարգը չեղարկելու ուղղությամբ առարկայական քայլեր չեղան, մասնավորաբար, «Հայաստանը ես եմ» նախաձեռնության կողմից նախատեսվում են առավել վճռական ու զանգվածային գործողություններ:

Մանրամասները՝ «Փաստ» օրաթերթի այսօրվա համարում