Իշխանությունը կրկին ձեռքերը լվաց ռազմագերիներից

Մինչ հանրությունը փոթորկվում է Ադրբեջանում ապօրինի պահվող հայ գերիների խոշտանգված լուսանկարները դիտելով, նրանց տանջելու մանրամասները տեսնելով, գործող իշխանությունները կրկին խուսափում են նրանց ազատմանն ուղղված քայլեր անելուց։

ԱԺ-Կառավարություն հարցուպատասխանը խորհրդարանում երեկ թեժ է անցել, մի քանի պատգամավորներ Նիկոլ Փաշինյանից հարցրել են, թե ինչ է անում ռազմագերիներին վերադարձնելու ուղղությամբ։ Փաշինյանն անվրդով պատասխանել է, թե տեղեկություններ ունեն, որ Բաքվում պահվող հայ գերիներին խոշտանգում են, օգտագործում արգելված միջոցներ: «Մեր գնահատականը հստակ է, որ արգելված միջոցներով, այդ թվում՝ ֆիզիկական, հոգեբանական, ճնշման գործիքներով, մեր ունեցած որոշ տեղեկություններով՝ այլ արգելված միջոցներով տեղի է ունենում արգելված ներգործություն: Դա բնականաբար, անընդունելի է մեզ համար», - ասել է նա՝ այդպես էլ չմանրամասնելով, թե ինչ է անում այդ պայմաններում գործող իշխանությունը։

Ավելին՝ Փաշինյանը հունից դուրս է եկել Ռուբեն Վարդանյանի մասին հարցից։ «Հայաստանի Հանրապետության վարչապետի աշխատանքային պարտականությունն է կենտրոնանալ ոչ միայն մեկ անձի հետաքրքրությունների, ոչ միայն մեկ անձի... այլև Հայաստանի Հանրապետության պետական շահերի և ՀՀ քաղաքացիների շահերի վրա, այո, այդ թվում՝ համաչափորեն, խելամիտ ձևով կենտրոնանալ այդ թվում՝ մեկ անձերի խնդիրների լուծման վրա: Եթե կա նպատակ այս տրամաբանությունը շրջել, դա անիրագործելի նպատակ է», - ասել է Փաշինյանը:

Մարիամ Սաֆարյան