BYD-ն ներկայացրել է էլեկտրամեքենաների գերարագ լիցքավորման համակարգ, ինչից հետո ավտոարտադրողի արժեթղթերի գինը կտրուկ բարձրացել է

Չինական BYD ավտոարտադրողի արժեթղթերի գինը բարձրացել է 5%-ով այն բանից հետո, երբ ընկերությունը ներկայացրել է էլեկտրական մեքենաների գերարագ լիցքավորման նոր համակարգը: Ընկերության 1 արժեթղթի գինը հասել է ռեկորդային բարձր մակարդակի՝ 408,8 հոնկոնգյան դոլարի, հայտնում է kommersant.ru-ն:

Super e-Platform-ը, ըստ ընկերության հայտարարության, էլեկտրական մեքենաները լիցքավորելու է նույնքան արագ, որքան բենզինային շարժիչներով մեքենաներն են լիցքավորվում: Լիցքավորման հզորությունը կհասնի 1 ՄՎտ-ի, ինչը երկու անգամ ավելի է Tesla Supercharger V4-ից։ Այս համակարգով 5 րոպե լիցքավորումից հետո էլեկտրական մեքենաները կկարողանան անցնել մոտ 400 կմ, ասել է BYD-ի հիմնադիր Վան Չուանֆուն նոր տեխնոլոգիայի շնորհանդեսի ժամանակ։ Համեմատության համար նշվում է, որ Tesla կայաններն ի վիճակի են 15 րոպե լիցքավորման ընթացքում էլեկտրական մեքենան ապահովել ևս 275 կմ անցնելու հնարավորությամբ:

BYD-ն հայտարարել է նաև նոր տեխնոլոգիաների կիրառմամբ լիցքավորման կայանների սեփական ցանցի ստեղծման մասին։ Ընկերությունն ակնկալում է ստեղծել ավելի քան 4,000 լիցքավորիչների ցանց։