Տնտեսությունն անկում է ապրում, աղքատության մակարդակը գնալով խորանում է , թանկացումները «շնչելու տեղ» չեն թողնում․ Նաիրի Սարգսյան

Նիկոլ Փաշինյանի իշխանությանը շատ քիչ է մնացել, քանի որ ամեն օր ավելի են մոտենում անդառնելիության շեմին: Դրա վերջին մեխերը համարվում են Թուրքիայի հետ սահմանի բացումը, և ամբողջությամբ թուրքական ապրանքներով ու ծառայություններով հայկական շուկան ողողելը: Այս մասին ասել է «Հայաստանը ես եմ» նախաձեռնության ղեկավար, տնտեսագետ Նաիրի Սարգսյանը:

Սարգսյանի խոսքով՝ դա կլինի ՀՀ տնտեսության մահը: Եթե որևէ երկիր ցանկանում են վերցնել, ապամոնտաժել, վերացնել, ապա դա պարտադիր չի իրականացնել պատերազմական գործողություններով. «Դրան կա երկու հիմնական մոտեցում. տնտեսապես ոչնչացնել պետությունը, որը կախման մեջ կլինի Թուրքիայից, իսկ հաջորդ տարբերակը պատերազմն է: Նիկոլ Փաշինյանի կառավարմանը շատ կարճ ժամանակ է մնացել», -ասաց Սարգսյանը:

«Մենք ունենք երկու հիմնասյուն, դա տնտեսական և անվտանգային հիմնասյուներն են: Մենք գիտենք, որ ոչնչացվել է մշակույթը, կրոնը, կրթությունը, առողջապահությունը, բոլոր ոլորտները, մեր ինքնությունը, մեր պատմությունը, բայց այս ամեն ինչի վերականգման համար, թեկուզ դպրոցական ծրագրերից սկսած, պետք է բնականաբար ֆինանասական միջոցներ, որպեսզի կարողանանք այդ ծախսերը սպասարկել: Դրա համար անհրաժեշտ է տնտեսության զարգացում, իսկ անվտանգությունը անհրաժեշտ պայմանն է մարդկության համար և դրանցից հետո պետք է կառուցենք հաջորդ հիմնասյունները», -ասել է Սարգսյանը:

Սարգսյանի խոսքով՝ տնտեսությունն անկում է ապրում, աղքատության մակարդակը գնալով խորանում է, թանկացումները «շնչելու տեղ» չեն թողնում, իսկ ներկա կառավարությունը մտածում է միայն իր իշխանության մասին ու ամեն գնով փորձում պահել այն։