Պատմական հիշողությունը պետք է փոխանցել սերունդներին. ինչպե՞ս նշվեց Հայրենական մեծ պատերազմում հաղթանակի 80-ամյակը Հայաստանում. «Փաստ»

«Փաստ» օրաթերթը գրում է.

Հայրենական մեծ պատերազմում հաղթանակի 80-ամյակը Հայաստանում ևս նշվել է պատշաճ կերպով, կազմակերպվել են մի շարք միջոցառումներ: Դրանց շարքում էին Սերգեյ Ասլանյանի «SA Foundation» հիմնադրամի աջակցությամբ կազմակերպված միջոցառումները, որոնց մի մասը միտված էր նախակրթարաններին անհրաժեշտ սարքավորումների տրամադրմանը: Մասնավորաբար՝ «Իմ Բալիկ», «Տուն-Տունիկ» և «ԽՈԽԱ» մանկապարտեզներին տրամադրվեցին գրենական պիտույքներ և գրասենյակային սարքավորումներ: Մանկապարտեզներից մեկում տեղադրվեց մանկական սահուղի, իսկ մյուսում՝ սկսվեցին երաժշտական սենյակի վերանորոգման աշխատանքները։ Այս բոլոր մանկապարտեզները Երևանում բացվել են Արցախից բռնի տեղահանված մեր հայրենակիցների կողմից։

Միջոցառումների մի մասն էլ ինտելեկտուալ էր: Անցկացվեց «Ի՞ՆՉ, Ե՞ՐԲ, ՈՐՏԵ՞Ղ» խաղի մրցաշար, որին մասնակցեց 30 թիմ՝ մոտ 150 մասնակիցներով։ Մրցաշարի հիմնական ուղերձն այն էր, որ իրավունք չունենք մոռանալ մեր պապերի, հայրերի, եղբայրների հերոսական անցյալը և նաև ինտելեկտուալ մրցաշարերի միջոցով պետք է պատմական հիշողությունը փոխանցենք սերունդներին: Իսկ գաղտնիք չէ, որ 80 տարի առաջ հաղթանակը ձեռք է բերվել նաև հայերի, այդ թվում՝ արցախահայերի մասնակցությամբ: Մայիսի 9-ը հայ ժողովրդի համար հիշատակվում է նաև որպես Շուշիի ազատագրման օր: Անկախ վերջին տարիների իրադարձություններից՝ այդ օրը չի կորցրել իր խորհուրդը, ուստի մրցաշարի կազմակերպիչներն այն բաժանել էին 2 փուլի։ Մեկ փուլն անցկացվեց ռուսերեն լեզվով՝ Հայրենական պատերազմին նվիրված որոշ հարցերով, երկրորդ փուլը՝ հայերենով: Այս պարագայում հարցերը նվիրված էին հիմնականում Արցախին և Արցախի ազատագրմանը։ Խաղի ավարտին մրցաշարի լավագույն գիտակներն արժանացան նվերների:

«SA Foundation» հիմնադրամի գործադիր տնօրեն Ելենա Արուցյանի խոսքով, մեր պատմությունը հիշեցնող միջոցառումները մշտապես հիմնադրամի ուշադրության կենտրոնում են: «Կարևորում ենք պատմական հիշողության պահպանումը և դրա փոխանցումը սերունդներին: Հենց այդ պատճառով ենք աջակցել միջոցառումներին, որոնք նվիրված են Հայրենական մեծ պատերազմի հաղթանակի 80-ամյակին»։

Սրանք տոնական օրվան նվիրված միջոցառումներ էին, բայց հիմնադրամի գործունեության հիմնական ուղղություններից մեկը SA Lab նախագիծն է, որի շրջանակներում մինչև 18 տարեկանները հնարավորություն ունեն ծրագրավորում սովորել: Ուսման ընթացքում գործի են դրվում ժամանակակից տեխնոլոգիաներ, այդ թվում՝ արհեստական բանականություն։ Հիմնադրամի բոլոր նախաձեռնությունների հիմքում աջակցությունն է երեխաներին ու երիտասարդներին, իրականացվում են կրթական տարբեր ծրագրեր, որպեսզի նրանք հետագայում կարողանան կերտել ոչ միայն սեփական բարեկեցիկ ապագան, այլև ներդրում ունենան Հայաստանի կայացման գործում:

Մանրամասները՝ «Փաստ» օրաթերթի այսօրվա համարում