Փաշինյան-Ադրբեջան տանդեմը թիրախավորել է Հայ առաքելական եկեղեցին. «Փաստ»

«Փաստ» օրաթերթը գրում է.

Նիկոլ Փաշինյանն իր քպականներով հակաեկեղեցական արշավի հերթական «արարն» է սկսել: Արշավ, որի սկիզբը դրվել է 2018 թվականի իշխանափոխությունից անմիջապես հետո՝ մե՛րթ մոլեգին ուժգնությամբ, մե՛րթ իբր «ընդմիջում» տալով, բայց իրականում «տակից» պայքարելով ամեն ազգայինի, այդ թվում՝ ՀԱԵ դեմ: Հիմա նոր ուժգնությամբ ու նոր «մակարդակով» են վերսկսել հարձակումը: Այս թեման վերջին մի քանի օրերի ամենաթեժ քննարկվողներից մեկն է, որին անդրադարձել է նաև «Հանրապետության հրապարակ» տելեգրամյան ալիքը՝ մասնավորաբար գրելով, որ Փաշինյան-Ադրբեջան տանդեմը թիրախավորել է Հայ առաքելական եկեղեցին. «Հայ առաքելական եկեղեցու դեմ երկրի ներսում պայքարում են Փաշինյանն ու ՔՊ-ն, որոնց համար հայկական ավանդական արժեքները, պետական և կրոնական ինստիտուտները, Հայ առաքելական եկեղեցին խորթ են և ներքին թշնամի են։ ՔՊ-ն պայքարում է, ծաղրում է Հայ առաքելական եկեղեցուն, Կաթողիկոսին՝ դրանով սպասարկելով թուրք-ադրբեջանական տանդեմի շահերը, քանի որ Հայ առաքելական եկեղեցին այսօր կանգնած է Արցախի հարցի, Հայ դատի, Հայոց ցեղասպանության միջազգային ճանաչման պայքարի պաշտպանության դիրքերում»:

Հեղինակները հիշեցնում են, որ Ամենայն հայոց կաթողիկոս Գարեգին Երկրորդը Շվեյցարիայում վերջերս քննադատել է Թուրքիայի աջակցությամբ Ադրբեջանի ագրեսիան և Արցախի հայաթափումը, Արցախի հայության դեմ իրականացված էթնիկ զտումներն ու ցեղասպան գործողությունները։ Այսինքն, Հայ առաքելական եկեղեցին քննադատում է Փաշինյանի ռազմավարական դաշնակիցներին՝ Թուրքիային և Ադրբեջանին, ինչից հետո Փաշինյանն սկսում է իր ֆեյսբուքյան էջում ամենակեղտոտ բառապաշարով քննադատել, վիրավորել սրբազաններին, Հայ առաքելական եկեղեցին։

«Փաշինյանի գրառումները խոսում են այն մասին, որ նա շարունակելու է թիրախավորել Հայ առաքելական եկեղեցուն, Մայր Աթոռը և դրանով երկու խնդիր է կատարում։ Նախ՝ սպասարկում է Էրդողան-Ալիև տանդեմի շահերն ու իրականացնում է նրանց հրահանգները։ Երկրորդ՝ Փաշինյանը ցանկանում է գրավել Հայաստանի մոտ 350 հազարի հասնող աղանդավորականների և նրանց ընտանիքի անդամների ձայները։ Թիրախավորելով Հայ առաքելական եկեղեցուն՝ Փաշինյանը ցանկանում է շահել նաև աղանդավորականների աջակցությունը 2026 թ. ԱԺ ընտրություններում: Փաշինյանն ու թիմը կազմաքանդում են հայոց պետականության հիմնասյուները՝ Հայոց բանակը, Մայր Աթոռը և հայ-ռուսական կապերը։ Բանակը կրճատվում է, ընդունվում են օրենքներ, որոնք թույլ կտան փողով ազատվել բանակից. դրվում են հայոց բանակի կազմաքանդման, լուծարման և բարոյազրկման հիմքերը։ Երկրորդ՝ Մայր Աթոռը պայքարում է Արցախի, Գանձասարի և Դադիվանքի համար, ինչը ՔՊ-ի համար կարմիր գիծ է, քանի որ Բաքվից նրանց ընկերները կարող են բարկանալ փաշինյանական կլանի վրա։ Եվ երրորդ՝ հայ-ռուսական ռազմական դաշինքը հակակշիռ է թուրք-ադրբեջանական տանդեմին, և ՔՊ-ն կազմաքանդում է հայ-ռուսական ռազմավարական դաշինքը, որպեսզի Սյունիքի գրավումը Բաքվի կողմից ավելի դյուրին լինի»,-գրում են հեղինակներն ու հավելում, որ, այսպիսով, Փաշինյանն ու թիմը ոչնչացնում են հայոց պետականության հիմնասյուները երկրի ներսից՝ դրանով սպասարկելով Ալիևի՝ «Արևմտյան Ադրբեջան» կոնցեպտը։

Մանրամասները՝ «Փաստ» օրաթերթի այսօրվա համարում