Թրամփը, անկարգությունների ֆոնին, Լոս Անջելես կուղարկի Ազգային գվարդիայի ևս 2,000 զինծառայողի. Կալիֆոռնիայի նահանգապետը պատրաստվում է դատի տալ նրան

ԱՄՆ դաշնային կառավարությունը որոշել է կրկնապատկել Ազգային գվարդիայի՝ Լոս Անջելեսում հակամիգրացիոն ռեյդերի դեմ բողոքի ցույցերի ֆոնին տեղակայված զորքերի թիվը՝ հասցնելով այն 4000-ի: Այս մասին Կալիֆոռնիայի նահանգապետ Գևին Նյուսոմը հայտարարել է երկուշաբթի՝ հունիսի 9-ին, X սոցիալական ցանցում:

Ազգային գվարդիայի նոր ստորաբաժանումներից բացի, Լոս Անջելես կուղարկվի նաև Կալիֆոռնիայի «Փենդլթոն» ճամբարից 700 ծովային հետևակային: ԱՄՆ նախագահի վարչակազմը որոշումը հիմնավորել է «դաշնային աշխատակիցներին և շենքերին սպառնացող սպառնալիքների աճով», գրում է AFP-ն:

ԱՄՆ նախագահ Դոնալդ Թրամփը, մեկնաբանելով Լոս Անջելեսում ընթացող բողոքի ցույցերը, անկարգություններ ստեղծելու համար մեղադրել է «պրոֆեսիոնալ խռովարարներին և անկարգությունների կազմակերպիչներին»։ Նա սպառնացել է Կալիֆոռնիա ուղարկել ավելի շատ դաշնային իրավապահ մարմինների։ Իսկ իր Truth Social»սոցիալական ցանցում գրառման մեջ Թրամփը սպառնացել է բռնություն կիրառել այն ցուցարարների նկատմամբ, որոնք «անհարգանք» կցուցաբերեն իր ուղարկած զինվորների նկատմամբ։

Կալիֆոռնիայի նահանգապետ, դեմոկրատ Գևին Նյուսոմը Լոս Անջելեսում բողոքի ցույցերը ճնշելու համար ծովային հետևակայիններին օգտագործելու Թրամփի որոշումը որակել է «հակաամերիկյան»։ Նյուսոմն ասել է, որ նման ստորաբաժանումները պետք է պայքարեն արտաքին սպառնալիքների դեմ, այլ ոչ թե ներքին։

«Նրանց չպետք է ուղարկեն ամերիկյան հող՝ մեր սեփական քաղաքացիների դեմ կռվելու և բռնապետ նախագահի խելահեղ ֆանտազիան իրականացնելու համար», - ասել է Կալիֆոռնիայի նահանգապետը։

Միաժամանակ Նյուսոմը խոստացել է դատի տալ Թրամփին։ Ամերիկյան օրենքների համաձայն՝ դաշնային վերահսկողության տակ գտնվող անվտանգության ուժերը անկարգությունների դեմ պայքարում կամ արտակարգ իրավիճակի դեպքում ներգրավելու համար նահանգային իշխանությունները պետք է իրենք համապատասխան հարցում ներկայացնեն Վաշինգտոնին։ Մինչդեռ Թրամփը դա արել է իր կամքով:

Հիշեցնենք, որ Լոս Անջելեսում զանգվածային անկարգությունները շարունակվում են ուրբաթ օրվանից: Ցուցարարները բողոքում են Թրամփի խիստ ներգաղթային քաղաքականության, մասնավորապես՝ ներգաղթյալների արտաքսման դեմ:

Տեսանյութերը կարող եք դիտել Tert.am-ի թելեգրամյան ալիքում: