Իրանը տարածաշրջանային անկայունության և ահաբեկչության հիմնական աղբյուրն է. G7-ի հայտարարությունը

G7 երկրների առաջնորդները Կանադայում կայացած գագաթնաժողովի եզրափակիչ հայտարարության մեջ հայտարարել են Իսրայելին աջակցելու մասին՝ Իրանը անվանելով Մերձավոր Արևելքում անկայունության և ահաբեկչության աղբյուր, հաղորդում են համաշխարհային լրատվամիջոցները։

«Իրանը տարածաշրջանային անկայունության և ահաբեկչության հիմնական աղբյուրն է», - առաջնորդների խոսքերն է մեջբերում The Guardian-ը։

Նրանք նաև կրկնեցին այն թեզը, որ Իրանը երբեք չպետք է միջուկային զենք ունենա։

«Մենք կոչ ենք անում իրանական ճգնաժամի կարգավորմանը հաջորդել Մերձավոր Արևելքում ռազմական գործողությունների հետագա թուլացումը, այդ թվում՝ հրադադարը Գազայի հատվածում», - ասվում է տեքստում։

Ըստ The New York Times-ի՝ եզրափակիչ հայտարարությունը ստորագրել են բոլոր յոթ առաջնորդները, այդ թվում՝ ԱՄՆ նախագահ Դոնալդ Թրամփը, ով վաղաժամ լքել էր Կանադայում կայացած գագաթնաժողովը՝ Մերձավոր Արևելքում ստեղծված իրավիճակի ֆոնին, չնայած ավելի վաղ լրատվամիջոցները հայտնել էին, որ Թրամփը կարող է հրաժարվել ստորագրել եզրափակիչ փաստաթուղթը։