Կապանցիները կվայելեն Մարթա Արգերիխի 3 համերգները, ուսանողները անվանիների հետ հանդես կգան նույն բեմում

Հուլիսի 4-ին բացվում է Կապան միջազգային երաժշտական փառատոնը՝ Kapan Fest-ը, որը հյուրընկալելու է աշխարհահռչակ երաժիշտների, այդ թվում՝ բոլոր ժամանակների ամենահայտնի 5 երաժիշտներից Մարթա Արգերիխին: Նա 3 համերգ կունենա Կապանում:

Այս հրաշալի փառատոնին, որ կտեւի մինչեւ հուլիսի 15-ը, սպասվում են համերգային յուրահատուկ ծրագրեր, վարպետության դասեր, հյուրերի հետ հանդիպումներ ու հետաքրքիր քննարկումներ։ Ինչպես Aravot.am-ի հետ զրույցում նշեց Կապան միջազգային երաժշտական փառատոնի հիմնադիր եւ գեղարվեստական ղեկավար, բելգիաբնակ թավջութակահար, միջազգային մրցույթների դափնեկիր Սեւակ Ավանեսյանը, փառատոնն անցկացվում է արդեն երրորդ անգամ, եւ կարեւոր դերակատարները տաղանդավոր ուսանողներն են:

Նրա խոսքով, այս տարի փառատոնին մասնակցում են ուսանողներ՝ ոչ միայն Հայաստանից, այլ Պորտուգալիայից, Սլովակիայից, Ռուսաստանից, Դանիայից: «Մեր երեխաները տարեցտարի ավելի լավ արդյունքներ են ցուցաբերում, ինչը նշանակում է, որ ճիշտ ուղու վրա ենք, փորձում ենք նրանց կարիերայում մեր ներդրումն ունենալ, շատ երեխաների կյանքն արդեն փոխել է փառատոնը: Kapan Fest-ի շնորհիվ Կապանի երիտասարդներին հակում ենք դեպի դասական երաժշտություն, ցույց ենք տալիս, որ համաշխարհային մեծության երաժշտները նվագելու են իրենց համար, աշխատելու են իրենց հետ, իրենց հետ հավասար՝ հանդես են գալու նույն բեմում»,-ասաց Սեւակ Ավանեսյանը:

Նա ընդգծեց, որ Հայաստանի ցանկացած անկյուն թանկ է իր համար, նախկինում էլ պարբերաբար Արցախ էր այցելում, իսկ փառատոնը Կապանում անցկացնելը մի քանի պատճառ ունի. «Պատճառներից ամենաառաջինը Կապանի արվեստի պետական քոլեջի հանրահայտ երգեհոնային դահլիճն է, որը, կարելի է ասել, Հայաստանի եւ աշխարհի՝ լավագույն ակուստիկա ունեցող դահլիճներից մեկն է: Վերջին 40 տարում այս դահլիճն անտեսված է: Ես արմատներով Կապանից եմ, այս դահլիճի մասին մանրամասն եմ լեգենդներ լսել, ցանկություն ունեի այդ դահլիճում նվագել, նվագեցի ու սիրահարվեցի երգեհոնային դահլիճին: Նաեւ նույն կարծիքն ու զգացողությունն են ունեցել բոլոր այն երաժիշտները, որոնք նվագել են այդ դահլիճում: Կապանի քաղաքապետ Գեւորգ Փարսյանի սերն ու նվիրվածությունը մշակույթին եւ քաղաքին եւս նպաստեցին, որ մեր փառատոնը կայանա, որովհետեւ եթե այդ ամենը չլիներ, մենք կլինեինք խորթ հյուր, սակայն Կապանում բոլորս մեզ զգում ենք ինչպես մեր տանը»:

85-ամյա Մարթա Արգերի՝ Հայաստան ժամանելը մեր զրուցակիցը երեւույթ է որակում, ասում է՝ նա հատուկ Կապան գալու համար մի քանի համերգ է չեղարկել: Սեւակ Ավանեսյանը Kapan Fest-ի մասնակից այլ հայտնի անուններ էլ նշեց՝ Ֆրանցիսկո Վիլա, Արթուրո Սոլար, Մարիան Պետրեսկու եւ այլք:

Փառատոնի հիմնադիրը նշեց, որ Kapan Fest-ն անցկացվում է ԿԳՄՍ նախարարության, Կապանի քաղաքապետարանի, Զանգեզուրի պղնձամոլիբդենային կոմբինատի եւ այլ գործընկերների աջակցությամբ:

Հավելեց նաեւ, որ Կապանի երեխաներին իրենք նվիրում են շուրջ 50 լարային գործիքներ, վերանորոգում 10 դաշնամուր:  Գոհար ՀԱԿՈԲՅԱՆ