Իշխանությունները լայն թափով գրոհ են սկսել ընդդիմության դեմ
Ինչպես և կանխատեսելի էր, Հայաստանի գործող իշխանությունները լայն թափով հարձակման են անցել ընդդիմադիր գործիչների դեմ։ Միքայել և Բագրատ սրբազաններին ու բարերար, գործարար Սամվել Կարապետյանին կալանավորելուց հետո կարծիք էինք հայտնել, որ Փաշինյանը և իր իշխանությունը խորհրդարանական ընտրություններին ընդառաջ կանգ չեն առնելու ոչնչի առջև, փորձելու են վարկաբեկել և պատժել իրենց բոլոր ընդդիմադիրներին, ինչը և այսօր տեղի է ունենում խորհրդարանում։
Գլխավոր դատախազ Աննա Վարդապետյանը երկու միջնորդագիր է ուղարկել Ազգային ժողով պատգամավորների համաձայնությունը ստանալու և ընդդիմադիր «Հայաստան» խմբակցության պատգամավոր Արթուր Սարգսյանի նկատմամբ քրեական հետապնդում հարուցելու, նրան կալանավորելու համար։ Խորհրդարանի ամբիոնից Վարդապետյանը պնդել է, թե կան բավարար ապացույցներ, որ ընդդիմադիր պատգամավորին մեղադրանք առաջադրվի, ահաբեկչություն նախապատրաստելու և իշխանությունը յուրացնելու հոդվածներով։ Դաշնակցական Սարգսյանի տանն էլ էր հունիսի 25-ին խուզարկություն իրականացվել։ Այդ օրը ձերբակալել էին Բագրատ Սրբազանին և նրա բազմաթիվ հետնորդների, իսկ պատգամավորին չէին տեղափոխել Քննչական կոմիտե։ Ըստ էության, սպասում էին խորհրդարանում միջնորդություն ներկայացնելուն։
Բացի այս, գլխավոր դատախազը միջնորդություն է ներկայացրել «Հայաստան» դաշինքի ևս 2 այլ պատգամավորների դեմ, այդ թվում՝ խմբակցության ղեկավար Սեյրան Օհանյանի և քարտուղար Արծվիկ Մինասյանի դեմ։ Թեպետ, այս միջնորդությունը կալանք չի նախատեսում, բայց քրեական գործ հարուցելը, նրանց անընդհատ հարցաքննությունների քարշ տալն ու քաղաքական պայքարից կտրելը փաշինյանական իշխանության համար օրախնդիր հարց է դարձել։
Դատախազությունը պնդում է, թե Սեյրան Օհանյանը պաշտպանության նախարարի պաշտոնը զբաղեցնելու տարիներին զավթել է Գեղարքունիքի մարզի Դրախտիկ համայնքում՝ Սևան ազգային պարարկի տարածքում գտնվող պետական հողատարածքը և առանց կառուցապատման իրավունքի դրա վրա առանձնատուն կառուցել, ապա հայտարարագրում թաքցրել այդ սեփականությունը։ Մինասյանն էլ, ըստ դատախազության, լինելով բնապահպանության նախարար, չի կատարել ծառայողական պարտականությունները, թաքցրել է Օհանյանին վերագրվող ենթադրյալ ապօրինությունները՝ դրանով պետությանն էական վնաս պատճառելով։
«Հայաստան» խմբակցությունը, ապա և «Պատիվ ունեմ»-ը, հրաժարվել են մասնակցել ընդդիմադիր պատգամավորների դեմ միջնորդությունների քննարկմանը։ Իսկ «Քաղաքացիական պայմանագրի» մանդատները բավարար են դատախազի բոլոր միջնորդությունները բավարարելու համար, մինչդեռ ընդդիմությունը կարող էր մնալ դահլիճում իր կոշտ հարցադրումներով և բարձրացրած աղմուկով հարամեր իշխանության տոնը։
Լուսինե Ավետյան
Հուսով եմ` տիկինը կհերքի Քաջարանի կոմբինատի բեռնափոխադրման մոնոպոլիստը լինելու ասեկոսեն․ Դանիելյան
Փաշինյանի ձեռամբ ադրբեջանցի հատուկ ջոկատայինները գալու են ու «խաղաղ» տեղավորվեն ՀՀ-ում. ադրբեջանագետ
Մահացել է անվանի բժիշկ Արտավազդ Սահակյանը
Ուզել են Արշակ Սրբազանի գրպանը բան գցեն, հիշել են՝ սքեմը գրպան չունի. Հայկ Մամիջանյան
Իշխանությունը քահանա է փնտրում. ինչ է կատարվում Գյումրիում. «Ժողովուրդ»
Ռուբլին թանկացել է․ փոխարժեքն՝ այսօր
Ինչո՞ւ «նետերն» ուղղվեցին հենց «կռիվը բաժանողի» վրա. «Փաստ»
Արշակ սրբազանին վերաբերող ճեպազրույցում անզգույշ մի արտահայտություն եմ արել․ փաստաբան
Ուրիշ ո՞ւմ հետ պետք է մենամարտեմ հիմա, եթե ոչ նրա. Ծառուկյանը նոր մրցակից է ընտրել
Վիճաբանություն և ծեծկռտուք՝ Երևանում. կա վիրավոր. 6 մասնակիցների ինքնությունը պարզվել է