ԵՄ-ն հետաձգում է X-ի դեմ հետաքննությունը՝ ԱՄՆ-ի հետ առևտրային բանակցությունների ֆոնին․ FT

ԱՄՆ-ի հետ ընթացող առևտրային բանակցությունների ֆոնին՝ Եվրոպական միությունը ժամանակավորապես դադարեցնում է Իլոն Մասկին պատկանող X սոցիալական ցանցի դեմ հարուցված հետաքննությունը։ Այս մասին տեղեկացրել է Financial Times-ը՝ հղում անելով իր աղբյուրներին։

Ըստ Financial Times-ի, Եվրամիությունը նախատեսում էր ամռանը հրապարակել հետաքննության արդյունքները, սակայն այժմ դա կարող է հետաձգվել։ Տվյալ որոշումը պայմանավորված է ԱՄՆ-ի և ԵՄ-ի միջև ընթացող առևտրային բանակցություններով, քանի որ կողմերը փորձում են խուսափել Դոնալդ Թրամփի բացասական արձագանքից և չեն ուզում սրել հարաբերությունները։

ԵՄ-ում X-ի նկատմամբ հետաքննությունը սկսվել է 2023 թվականի դեկտեմբերին։ Եվրահանձնաժողովը կասկածում է, որ ընկերությունը խախտում է թվային ծառայությունների մասին օրենքը, որը պարտավորեցնում է ինտերնետ-ռեսուրսների օպերատորներին՝ առանց դատական որոշումների հեռացնել այն բովանդակությունը, որը Եվրոպական միությունում արգելված է համարվում։