2025–ին 400 անձ կօգտվի անապահով ընտանիքի աշխատունակ անձանց աջակցության ծրագրից

Կառավարությունն իր այսօրվա՝ հուլիսի 24–ի նիստում որոշեց 197 մլն 350 հազար դրամ հատկացնել անապահովության գնահատման համակարգով անապահով ճանաչված ընտանիքի աշխատունակ անձանց համար կարճաժամկետ ուսուցման դասընթացի կազմակերպման, աշխատանքային փորձ ձեռք բերելու համար աջակցության ծրագրի համար։

Ծրագրով նախատեսվում է աջակցել շահառուին ձեռք բերելու գործատուի կողմից ներկայացված պահանջներին համապատասխան մասնագիտական հմտություններ, կարողություններ և աշխատանքային փորձ՝ գործատուի մոտ առկա թափուր աշխատատեղը համալրելու նպատակով։ Նախատեսվում է շահառուների զբաղվածության ապահովման 3 ուղղություն՝

ուսուցում և աշխատանքի տեղավորում,

աշխատանքային փորձի ձեռքբերում և աշխատանքի տեղավորում,

աշխատանքի տեղավորում՝ գործատուին մասնակի փոխհատուցում տրամադրելու միջոցով։

2025թ․ նախատեսվում է ծրագրում ընդգրկել 400 շահառու, որի համար պահանջվող ֆինանսական միջոցների չափը կազմում 197,350,000  դրամ։

Նախագծի իրականացման արդյունքում ակնկալվում է գործատուների մոտ առկա թափուր աշխատատեղերը համալրել անհրաժեշտ մասնագիտական կարողություններ և հմտություններ ունեցող շահառուներով՝ ապահովելով վերջիններիս կայուն զբաղվածությունը։

Ուսուցման ուղղությամբ 2025 թ.-ին ծրագրում կընդգրկվի 70 շահառու, որի համար կպահանջվի 38,500,000 դրամ, աշխատանքային փորձի ձեռքբերման ուղղությամբ՝ 130-ը, որի համար կպահանջվի 83,850,000 դրամ, գործատուին մասնակի փոխհատուցման տրամադրման ուղղությամբ՝ 200-ը, որի համար կպահանջվի 75,000,000 դրամ։

Միավոր ծրագրի արժեքը ծրագրային 3 ուղղությունների դեպքում հետևյալն է՝

ուսուցում և աշխատանքի տեղավորում՝ գործատուին հարկերի և պարտադիր վճարների փոխհատուցում՝550,000 դրամ (250000+ 6*50000),

աշխատանքային փորձի ձեռքբերում և աշխատանքի տեղավորում՝ հարկերի և պարտադիր վճարների փոխհատուցում՝ 645,000 դրամ (3*165000+3*50000),

մասնակի փոխհատուցում գործատուին՝ 300,000 (6*50,000) կամ 900,000 դրամ (12*75000)։