«Աբովյան» ՔԿՀ–ում անչափահասների և մինչև 21 տարեկանների համար կկառուցեն նոր սանհանգույցներ՝ անհատական ցնցուղներով

Կառավարությունն իր այսօրվա՝ հուլիսի 24–ի նիստում որոշում կայացրեց, որով ԱՆ «Աբովյան» քրեակատարողական հիմնարկում գոյություն ունեցող կանանց տեղամասը վերափոխվի  անչափահասների և մինչև 21 տարեկան անձանց պահման վայրի։

Այդ նպատակի համար ստորագրված պայմանագրի արժեքը 1,98 մլն դրամ է։

Հիմնավորման մեջ նշվում է, որ անչափահասները և մինչև 21 տարեկան անձինք հանդիսանում են խոցելի խումբ, վերջիններիս վերասոցիալականացումն ավելի արդյունավետ իրականացնելու նպատակով՝ հաշվի առնելով անազատության մեջ գտնվելու հանգամանքը, նախատեսվել է անչափահաս և մինչև 21 տարեկան անձանց անազատության մեջ գտնվելու ժամանակահատվածում վերջիններիս պահել առանձնացված վայրում՝ հաշվի առնելով տարիքը և առանձնահատկությունները։

Անհրաժեշտ է իրականացնել  վերակառուցման և հարդարման աշխատանքներ՝ նոր սանհանգույցների իրականացում անհատական ցնցուղներով, նոր զբոսաբակերի կառուցում, ներքին ջրամատակարարման և ջրահեռացման համակարգերի իրականացում, նոր էլ. մատակարարման ցանցերի ստեղծում, տանիքում օդատարների իրականացում, նոր խցերի, կացարաների և աշխատասենյակների վերակառուցում։

Վերջնական նպատակը և նշված աշխատանքները հնարավոր չէ իրականացնել ընթացիկ վերանորոգման միջոցով, քանի որ անհրաժեշտ է իրականացնել մեծածավալ շինարարական աշխատանքներ։