Կամբոջան Թաիլանդին կոչ է արել անհապաղ դադարեցնել կրակը, մինչդեռ երկու երկրներում զոհերի թիվը գերազանցել է 30-ը

Ըստ BBC News-ի՝ Կամբոջան կոչ է արել Թաիլանդին անհապաղ դադարեցնել կրակը։ Երկու երկրների միջև շարունակվող սահմանային բախումների հետևանքով զոհվել է ավելի քան 30 մարդ, այդ թվում՝ քաղաքացիական անձինք։

Կամբոջայի մշտական ներկայացուցիչ ՄԱԿ-ում՝ Չհեա Կեոն, հայտարարել է, որ իր երկիրն անվերապահորեն դիմել է հրադադարի խնդրանքով՝ հավելելով, որ Պնոմպենը «վեճի խաղաղ կարգավորում» է ցանկանում։ Թաիլանդը հրապարակայնորեն չի մեկնաբանել առաջարկը՝ մերժելով երրորդ կողմի միջնորդությունը։ Ավելի վաղ Թաիլանդը ռազմական դրություն է հայտարարել Կամբոջայի հետ սահմանակից ութ շրջաններում։

Առնվազն 32 մարդ՝ զինվորականներ և խաղաղ բնակիչներ, սպանվել են, իսկ շուրջ 200 000 մարդ տեղահանվել է։ Հարավարևելյան Ասիայի երկու երկրները միմյանց են մեղադրում հինգշաբթի օրվա առաջին կրակոցների համար։

Թաիլանդի զինվորականները շաբաթ օրը հայտարարել են, որ կամբոջացիները հարձակումներ են գործել երկրի հարավում գտնվող ափամերձ նոր շրջանում, սակայն նրանց հետ են մղել ռազմածովային ուժերը։

Թաիլանդն ավելի վաղ հայտնել է Կամբոջայի հետ սահմանի երկայնքով գտնվող Սուրին, Ուբոն Ռաթչաթանի և Սիսակետ նահանգներում մարտերի մասին։ Բանգկոկի պաշտոնյաները հայտնել են, որ հինգշաբթի օրվանից երկրում զոհվել է 19 մարդ, որոնցից 13 խաղաղ բնակիչ և վեց զինվոր։ Թաիլանդի պաշտոնյաները հավելել են, որ մոտ 140 000 մարդ տարհանվել է։

Կամբոջայի պաշտպանության նախարարությունը հայտնել է 13 զոհի մասին՝ ութ խաղաղ բնակիչ և հինգ զինվոր։ Ավելի քան 35 000 մարդ լքել է իր տները։ Թաիլանդի վարչապետի պաշտոնակատար Փհումթամ Վեչայաչայը ուրբաթ օրը զգուշացրել է, որ բախումները կարող են «վերաճել պատերազմի»։

Նա ասել է, որ մարտերում այժմ ներգրավված են ծանր սպառազինություններ և դրանք տարածվել են սահմանի երկայնքով գտնվող 12 բնակավայրերում։ Թաիլանդը նաև մեղադրել է Կամբոջային խաղաղ բնակավայրերը գնդակոծելու մեջ և տարհանել է բոլոր այն գյուղերը, որոնք, ենթադրաբար, գտնվում էին հրթիռահեռահարության գոտում։

Կամբոջան, իր հերթին, մեղադրել է Թաիլանդին կասետային զինամթերքի օգտագործման մեջ։