Վրաստանը ԱՄՆ-ում նոր դեսպան է նշանակել

Վրաստանի նոր դեսպան Թամար Թալիաշվիլին իր հավատարմագրերը հանձնել է ԱՄՆ նախագահ Դոնալդ Թրամփին, հայտնում է «Նովոստի-Գրուզիա»-ն՝ հղում անելով երկրի ԱԳՆ մամուլի ծառայությանը։ Թրամփը դիվանագետին հաջողություն է մաղթել հետագա նախաձեռնություններում։ Սպիտակ տանը կայացած արարողությանը ներկա է եղել նաև ԱՄՆ պետքարտուղար Մարկո Ռուբիոն։

Թալիաշվիլիի խոսքով՝ հանդիպումը տեղի է ունեցել «շատ ջերմ ու բարեկամական մթնոլորտում», իսկ ինքը Թրամփին է փոխանցել Վրաստանի կառավարության «բարեմաղթանքներն ու կարևոր ուղերձները»։

Թալիաշվիլին հանդիպումից հետո իր մեկնաբանության մեջ ասել է՝ «Դրանք նշանակում են, որ Վրաստանի կառավարությունը պատրաստ է նոր էջ բացել մեր հարաբերություններում և դրանք կառուցել փոխշահավետ հիմքի վրա, որպեսզի մեր գործընկերությունն ավելի ամուր դառնա, իսկ մարդկանց միջև այս փուլում առկա հարաբերություններն էլ ավելի կամրապնդվեն»։

Նրա խոսքով՝ նախօրեին նա նաև քննարկել է երկկողմ հարաբերությունները Սպիտակ տան արարողակարգի ղեկավար, պետքարտուղարի օգնական Մոնիկա Քրոուլիի հետ։ Թալիաշվիլին ընդգծել է, որ մոտ ապագայում վրացական կողմը գործողությունների որոշակի պլան կմշակի, որը «որպես ուղեցույց կծառայի ԱՄՆ-ի հետ համագործակցությունն ապահովելու համար»։

Վրաստանի կառավարությունը Թամար Թալիաշվիլիի իր թեկնածությունն ԱՄՆ-ում դեսպանի պաշտոնում ներկայացրել է հունիսի 10-ին՝ 2024 թվականի վերջին հրաժարական տված Դավիթ Զալկալիանիի փոխարեն։ Նշանակումը տեղի է ունեցել այն բանից ընդամենը մի քանի օր անց, երբ Վրաստանում ԱՄՆ դեսպան Ռոբին Դաննիգանը հայտարարել է դիվանագիտական ծառայությունից հեռանալու մասին։ Վարչապետ Իրակլի Կոբախիձեն բազմիցս նշել է այս փաստը՝ կապելով երկու իրադարձությունները։ Կոբախիձեն վստահ է, որ դեսպանների փոխարինումը կօգնի Վրաստանին և ԱՄՆ-ին «վերագործարկել» հարաբերությունները, որոնք, նրա խոսքով, «փչացրել է» Ջո Բայդենի վարչակազմը։