Իսրայելը մտադիր է ամբողջությամբ օկուպացնել Գազան․ Ynet

Իսրայելի կառավարությունը՝ վարչապետ Բենիամին Նեթանյահուի գլխավորությամբ, պատրաստվում է հաստատել Գազայի հատվածի լիակատար օկուպացիայի ծրագրերը: Այս մասին Ynet պորտալին հայտնել են Նեթանյահուի շրջապատի բարձրաստիճան պաշտոնյաները։

«Զառը նետված է, մենք շարժվում ենք դեպի Գազայի հատվածի լիակատար օկուպացիա», – ասել են պաշտոնյաները։

Միևնույն ժամանակ, Ynet-ը նշում է, որ Իսրայելի ռազմական ղեկավարությունը, այդ թվում՝ շտաբի պետը, դեմ է նման որոշմանը: Նա պետք է այցելեր օգոստոսի 4-ին, բայց չեղարկեց այցը: Սակայն կառավարությունը հստակեցրեց, որ պատրաստ է անտեսել զինվորականների կարծիքը: «Մարտական գործողություններ կանցկացվեն նույնիսկ այն տարածքներում, որտեղ պատանդներ են պահվում: Եթե Իսրայելի պաշտպանության բանակի շտաբի պետին սա դուր չգա, նա կարող է հրաժարական տալ», – Ynet-ը մեջբերում է պաշտոնյաներից մեկի խոսքերը։

Պորտալի տվյալներով՝ Նեթանյահուն շուտով կարող է կաբինետին ներկայացնել առաջարկ՝ բանակին Գազայի հատվածի լիակատար օկուպացիայի հրաման տալու վերաբերյալ: Ynet-ի փոխանցմամբ՝ Իսրայելի քաղաքական ղեկավարությունը եկել է այն եզրակացության, որ համաձայնագրի արդյունքում պատանդների ազատ արձակումն այլևս հնարավոր չէ այն պատճառով, որ բանակցությունները փակուղի են մտել։

Նեթանյահուն դեռևս պաշտոնապես չի հայտարարել, որ Իսրայելը մտադիր է ամբողջությամբ օկուպացնել պաղեստինյան անկլավը։ Միևնույն ժամանակ, նա բազմիցս ընդգծել է, որ իր երկիրը մտադիր է ամեն դեպքում հասնել Գազայում պատերազմի հիմնական նպատակներին՝ ջախջախել արմատական ՀԱՄԱՍ շարժման ռազմաքաղաքական կառուցվածքը և վերադարձնել գոտում պահվող բոլոր առևանգվածներին։