ԱՄՆ-ում փորձում են «ավելի խելացի» սերունդ ստեղծել՝ օգտագործելով առաջադեմ գենետիկական թեստավորում և սաղմերի ընտրության տեխնիկա. WSJ

Սիլիկոնյան հովտի առաջատար տեխնոլոգիական ընկերությունները մեծ ներդրումներ են կատարում «ավելի խելացի» սերունդ ստեղծելու համար՝ օգտագործելով առաջադեմ գենետիկական թեստավորում և սաղմերի ընտրության տեխնիկա, հաղորդում է The Wall Street Journal-ը։

Որոշ ՏՏ ընկերությունների ղեկավարներ մինչև 50,000 դոլար են վճարում ապագա երեխաների IQ-ն կանխատեսելու ծառայությունների համար։

Nucleus Genomics և Herasight ստարտափները առաջարկում են 6,000-ից մինչև 50,000 դոլար արժողությամբ սաղմերի գենետիկական թեստավորում՝ այդպիսով կանխատեսելով սաղմի ոչ միայն հիվանդության ռիսկերը, այլև պոտենցիալ ինտելեկտը: Նման ծառայությունների պահանջարկն արագորեն աճում է:

«Սիլիկոնյան հովտում սիրում են IQ-ն», - ընդգծել է Nucleus Genomics-ի հիմնադիր Կիան Սադեղին։

Սան Ֆրանցիսկոյից ինժեներների մի զույգ ստեղծել է բարդ գնահատման համակարգ՝ «օպտիմալ» սաղմն ընտրելու համար՝ հաշվի առնելով հիվանդության ռիսկերը և կանխատեսված IQ-ն: 

«Սա հիանալի գիտաֆանտաստիկ պատմություն է. հարուստները ստեղծում են գենետիկական սուպերկաստա, որը գերիշխում է», - ասում է Սթենֆորդի համալսարանի իրավունքի և կենսաբանական գիտությունների կենտրոնի տնօրեն Հենք Գրիլին։

Գիտնականները կարծում են` սաղմերի գենետիկական կատարելագործումը ի վերջո կծառայի որպես արհեստական բանականության սպառնալիքի դեմ պաշտպանություն։ Բերկլիի գենոմիկայի նախագծի համահիմնադիր Բենսոն Թիլսենի խոսքով՝ ավելի զարգացած ինտելեկտ ունեցող մարդիկ կկարողանան պարզել, թե ինչպես արհեստական բանականությունը համապատասխանեցնել մարդկային արժեքներին կամ համոզել ուրիշներին ընդհանրապես չզարգացնել այն։