ԶՊՄԿ-ում անվտանգության նոր չափորոշիչներ են սահմանվում

Հանքարդյունաբերական ոլորտի տեխնոլոգիական նորագույն ձեռքբերումներից մեկը գործարկվել է Քաջարանի հանքավայրում։ Լանջերի կայունության մոնիտորինգ իրականացնող ռադարը էապես կրճատում է հնարավոր փլուզումների ռիսկերը։ «Զանգեզուրի պղնձամոլիբդենային կոմբինատի» նոր ձեռքբերումը 2,5 կմ հեռավորությունից 24 ժամ մշտադիտարկում է անում սարքավորումը, ֆիքսում տեկտոնական տատանումները։ Հայաստանի թիվ մեկ հարկատուն հատկապես վերջին տարիներին մեծ աշխատանք է իրականացնում անվտանգության մակարդակն ավելացնելու ուղղությամբ։

Ընդ որում, այդ աշխատանքներն ուղղված են ոչ միայն բնապահպանական վիճակի բարելավմանը, այլև աշխատանքի անվտանգության կանոնների պահպանությանը։ Պահպանելով աշխատանքի անվտանգության տարրական կանոնները՝ դու ապահովագրում ես քեզ և գործընկերներիդ միջադեպերից ու դժբախտ պատահարներից։ «Անվտանգությունն առաջին հերթին պատասխանատվություն է և կարգապահություն», - նշում են ԶՊՄԿ-ում։

Վերջին տարիներին ԶՊՄԿ-ում աշխատանքի անվտանգության կանոններին խստորեն հետևելու արդյունքում արձանագրվել է աշխատավայրում տեղի ունեցած դեպքերի դինամիկայի նվազում։ Ընկերության նպատակն է հասնել «Զրո միջադեպ» ցուցանիշին։ «Զանգեզուրի պղնձամոլիբդենային կոմբինատում» ավելի վաղ ԼԻԴԱՐ (Light Detection and Ranging) համակարգեր են տեղադրվել։

Դրոնների օգնությամբ մարկշեյդերները միլիմետրի ճշգրտությամբ սկանավորում են ամբողջ տարածքը՝ հանքի ռելիեֆը և տարածքային փոփոխությունները, հողի ծավալների հաշվարկը, անվտանգության գոտիների հստակեցումը և հանքի արդյունավետ շահագործման պլանավորումը։

Անի Մուրադյան