Արեգակի վրա հզոր բռնկում է տեղի ունեցել․ սպասե՞լ մագնիսական փոթորկի սեպտեմբերի 5-ին

Ռուսաստանի գիտությունների ակադեմիայի տիեզերական հետազոտությունների ինստիտուտի (IKI) Արեգակնային աստղագիտության լաբորատորիան հայտնել է, որ Արեգակի վրա M դասի բռնկում է տեղի ունեցել։ Այս մասին հաղորդում է «Ռիա Նովոստի»-ն։

«Վերջին բռնկումը տեղի է ունեցել այսօր՝ ժամը 16:44-ին՝ M1.0 (ուժեղ) մակարդակով», - ասվում է հաղորդագրության մեջ։

Ավելի վաղ՝ օգոստոսի 25-ին, տեղի է ունեցել հունիսի վերջից ի վեր ամենամեծ բռնկումը։ Իրադարձությունն ուներ M4.6 վարկանիշ և պատկանում էր հինգբալանոց սանդղակով չորրորդ կատեգորիային։

Գիտնականների կարծիքով, սա տեղի է ունեցել արեգակնային ակտիվության կտրուկ աճի ֆոնին, որը կապված է արեգակնային սկավառակի տեսանելի կողմում մի քանի խոշոր կենտրոնների ի հայտ գալու հետ։ Դրանք առաջացրել են շատ ուժեղ պլազմային արտանետումներ։ Սակայն, լաբորատորիան նշել է, որ բռնկումը չպետք է որևէ ռիսկ ներկայացնի Երկրի համար։

Սեպտեմբերի 5-ին սպասվում է գեոմագնիսական ակտիվության աստիճանական աճ, որը կապված է արագ արեգակնային քամու հոսքի մոտեցման հետ։ Արեգակնային քամու հոսքի աղբյուրը աստղի սկավառակի հարավային մասում գտնվող մեծ պսակային անցքն էր։

ԱՄՆ-ի Ազգային օվկիանոսային և մթնոլորտային վարչության և Մեծ Բրիտանիայի օդերևութաբանական ծառայության տվյալներով՝ մագնիսոլորտում զգալի փոփոխությունները կսկսեն դրսևորվել երեկոյան մոտ և կշարունակվեն սեպտեմբերի 6-ի գիշերը։ Միևնույն ժամանակ, սեպտեմբերի 5-ի համար մագնիսական փոթորիկ դեռևս չի կանխատեսվում։