Վաշինգտոնում ստորագրված Հռչակագրում և նախաստորագրված Խաղաղության համաձայնագրում առկա բոլոր խնդիրները մենք դեռ մեկ ամիս առաջ ենք բացահայտել. Էդմոն Մարուքյան

Դիտեցի ԱԺ–Կառավարություն հարցուպատասխանը, որը ավելի շատ պոեզիայի երեկո էր հիշեցնում։ Պարզապես խղճահարություն էին առաջացնում խորհրդարանական ընդդիմության ներկայացուցիչների հարց-ելույթները։

Ինչպե՞ս թույլ տվեցին, որ վարչապետը այդքան հեշտությամբ շրջանցի այն հարցերը որոնց մասին օգոստոսի 8-ից խոսում ենք։ Խնդիրը, սակայն, ոչ թե Փաշինյանի հռետորական հնարքներում է, այլ ընդդիմադիր պատգամավորների հարցերում և արձագանքներում՝ որոշ բացառություններով։

Վաշինգտոնում ստորագրված Հռչակագրում և նախաստորագրված Խաղաղության համաձայնագրում առկա բոլոր խնդիրները մենք դեռ մեկ ամիս առաջ ենք բացահայտել, և այժմ դրանք արդեն ակնհայտ են բոլորի համար։

Հենց ստորագրման օրվանից սկսած մանրամասն բացատրել ենք, թե ինչ խնդրահարույց կետեր կան յուրաքանչյուր փաստաթղթում։ Այդ թվում՝ բացահայտել ենք նաև վարչապետի պաշտոնական կայքում Դոնալդ Թրամփի կարգավիճակի կեղծումը։ Եվ հայկական քաղաքական դաշտի բոլոր ուժերը օգտվել են մեր այդ վերլուծությունից, սակայն այսօր ԱԺ ընդդիմությունը արձանագրեց հերթական ֆիասկոն հարցուպատասխանի ձևաչափում։

Եթե հարց եք տալիս, բայց պատասխանից հետո հայտնվում եք անհարմար դրության մեջ, ապա ի՞նչ իմաստ ունի ձեր հարց տալը։ Նույն տրամաբանությամբ՝ եթե չեք կարողանում իրական վերահսկողություն իրականացնել, առհասարակ ի՞նչ գործ ունեք խորհրդարանում։