Շատ տիպիկ է Դաշնակցության համար անել մի բան, որն ուշացած է, անիմաստ և հիմնված կեղծ տեղեկությունների վրա. Ռուբինյանը՝ ՀՅԴ-ականների ակցիայի մասին

Ես ընդհանրապես երիտասարդներին, այդ թվում դաշնակցական երիտասարդներին, քամանրանքով չեմ վերաբերվում, ասում եմ հետևյալը՝ շատ տարօրինակ է, որ ես Ազգային Ժողովում նիստ եմ վարում Սևանից Ջրառի մասին, և այդ ընթացքում ՀՅԴ Երիտասարդաց Միությունը կառավարության դիմաց պիկետ է անում: Այս մասին ԱԺ նիստում ասաց ԱԺ փոխխոսնակ Ռուբեն Ռուբինյանը:

«Պիկետի օրակարգն էլ Հայաստան-Թուրքիա կարգավորման գործընթացում բանակցողներին  իրենց դժգոհությունը հայտնելն է։ Այդ բանակցողներից մեկը ես եմ: Սա շատ տիպիկ է Դաշնակցության համար, անել մի բան, որը ուշացած է, անիմաստ և հիմնված կեղծ տեղեկությունների վրա»,- ասաց նա:

Ռուբինյանը նշեց, որ այդ «պիկետը» պետք էր անել երկու ժամ շուտ, երկրորդը պետք էր անել ԱԳՆ-ում, ոչ թե կառավարությունում, որովհետև ԱԳՆ-ի շենքում էր հանդիպումը:

«Այդ պիկետի բովանդակությունը հետևյալն է, որ բանակցությունների առարկան գաղտնի է պահվում հանրությունից: Գաղտնի չի պահվում, ժողովուրդ ջան, քննարկել ենք Հայաստան-Թուրքիա հարաբերությունների կարգավորման գործընթացը, և մոտակա ժամերի ընթացքում մամուլի հաղորդագրություն կլինի, սա է: Ես ընդամենն ուզում էի ի ցույց դնեի Դաշնակցության ղեկավարության անիմաստ և կեղծ օրակարգեր հետապնդելը և նաև ի ցույց դնել, որ չեք մտածում ձեր երիտասարդների մասին էլի»,- ասաց ԱԺ փոխխոսնակը:

Նշենք, որ ՀՅԴ երիտասարդները ակցիա են իրականացրել կառավարության շենքի մոտ, որտեղ մասնավորապես հայտարարել են. «Հայաստան է ժամանել Թուրքիայի հատուկ ներկայացուցիչ Սեյդար Քըլըչը՝  Հայաստան-Թուրքիա միջպետական ճանապարհների կարգավորման անվան տակ, սակայն, բոլորս հասկանում ենք, որ այս հանդիպումը քաղաքական կողմի նախապայմանները բավարարելու համատեքստում են: Դրա վառ ապացույցն է ՀՀ Կառավարության՝ այցի ժամանակացույցն ու օրակարգը գաղտնի պահելը: Մենք այստեղ ենք՝ ասելու, որ դեմ ենք ուրացման քաղաքականությանը»: