Ե՞րբ Փաշինյանը կգրոհի Վեհարանը

Արմավիրի մարզի Վաղարշապատ համայնքում մեկնարկել է ՏԻՄ ընտրությունների առաջադրման գործընթացը, իսկ արդեն հոկտեմբերի 22-ից, երբ գրանցված կլինեն ընտրություններին մասնակցող բոլոր կուսակցություններն ու դաշինքները, սկսվելու է պաշտոնական քարոզարշավը։ Նիկոլ Փաշինյանը խոստացել էր Էջմիածնում մեծ հանրահավաք հրավիրել ընդդեմ կաթողիկոսի։ Մի քանի անգամ նա պնդել է իր կարծիքը, որ անհրաժեշտ է իրականացնել այդ գործողությունը։

Տևական ժամանակ մարդիկ սպասում են, թե երբ է Փաշինյանը, ի վերջո, սկսելու Վեհարանի դեմ գրոհը։ ՔՊ մեր աղբյուրների փոխանցմամբ, այժմ 2 ժամկետ է շրջանառվում՝ կա՛մ հոկտեմբերի վերջին, ամենայն հավանականությամբ հոկտեմբերի 27-ին, կա՛մ էլ՝ նոյեմբերի սկզբին։ Հոկտեմբերի 27-ը մեր պատմության ամենաողբերգական էջերից մեկն է, երբ խորհրդարանում սպանվեցին վարչապետը, ԱԺ նախագահը և այլ պաշտոնյաներ։ 1999 թվականի հոկտեմբերի 27-ին էլ տեղի է ունեցել Գարեգին Բ կաթողիկոսի ընտրությունը, և, ըստ ամենայնի, հենց այդ օրն էլ Փաշինյանը ցանկանում է սկսել իր գրոհը՝ խորհրդանշական իմաստ հաղորդելով դրան։

Իսկ իր ծրագրերն իրականություն դարձնելու համար Փաշինյանը փորձում է նաև ստանալ որոշ եկեղեցականների աջակցությունը։ Մինչ այս պահը գործող իշխանություններին հաջողվել է իրենց կողմը գրավել Հայ առաքելական եկեղեցու 3 գործող քահանաների՝ Տեր Արամ Ասատրյանին, Տեր Թադե Թախմազյանին և Տեր Տարոն Հունանյանին, որոնք սոցիալական ցանցերում կամ լրատվամիջոցներով քննադատություններ են հնչեցնում Էջմիածնի հասցեին։ Փաշինյանն, ի դեպ, կարծում էր, թե կարող է ավելի մեծ թվով քահանաների իր կողմը գրավել, բայց այս երեքի միջոցով փորձելու է իրականացնել գրոհը Վեհարանի դեմ։

Հասմիկ Մուրադյան