Փաշինյանի արևմտամետները Վաղարշապատում նոր «օպերացիա» են ծրագրում

«Վաղարշապատը Գյումրի-2 չի դառնա» կարգախոսով Վաղարշապատի ընտրություններին մասնակցող «Հանրապետություն» կուսակցությունը գնալով ավելի ու ավելի շատ է ապացուցում, որ իր միակ նպատակը գործող իշխանությունների՝ «Քաղաքացիական պայմանագրի» վերարտադրությունն է Վաղարշապատում։ Հրաշալի հասկանալով, որ Վաղարշապատում պարտվելու դեպքում Փաշինյանին իշխանափոխություն է սպասվում ողջ երկրում, Արամ Սարգսյանի գլխավորած կուսակցությունը փորձում է ամեն ինչ անել՝ փոշիացնելու ընդդիմության իրական ձայները։

Նշենք, որ այս կուսակցության թեկնածուն քաղաքագետ Հարություն Մկրտչյանն է, որը հայտնի է տարբեր իշխանական ԶԼՄ-ներում Փաշինյանի ընդդիմախոսների հասցեին վիրավորանքներ տարածելով։ Ի դեպ, մեր տեղեկություններով, «Հանրապետությունը» սեփական անունով չէ, որ մասնակցելու ընտրություններին։ «Հանուն Հանրապետության» կուսակցությունը՝ Արման Բաբաջանյանի գլխավորությամբ, կարող է դաշինք կազմել «Հանրապետության» հետ, իսկ այդ դաշինքի անունն էլ դնելու են «3-րդ ուժ․ Այլընտրանք»։

Այդ կերպ Փաշինյանի ձեռնասուն արևմտամետները ցանկանում են մոլորեցնել հանրությանը՝ թե իբր իրենք այլընտրանք են թե՛ գործող իշխանություններին, և թե՛ նախկիններին, որոնց նկատմամբ օբյեկտիվորեն որոշակի դժգոհություն կա հանրության շրջանում։ Եվ այդ կերպ՝ փոշիացնելով ձայները, Սարգսյանն ու Բաբաջանյանը ցանկանում են Նիկոլ Փաշինյանի համար հնարավորություններ ստեղծել։ Ի դեպ, թե՛ Արամ Սարգսյանը, և թե՛ Արման Բաբաջանյանը սոցցանցերում հանդես են գալիս որպես հավատավոր քրիստոնյաներ, բայց այն, ինչ նրանք անում են հանուն Փաշինյանի Վաղարշապատում՝ ընդդեմ Հայ առաքելական եկեղեցու, որևէ կերպ տրամաբանության մեջ չի տեղավորվում։

Նունե Սուքիասյան