Մոլդովական փորձը շատ բան է սովորեցրել հայկական ընդդիմությանը

Մոլդովայում կայացած ընտրությունները դարձել են առիթ Հայաստանի գործող իշխանությունների համար՝ ընդդիմության հասցեին սպառնալիքներ հնչեցնելու։ Նիկոլ Փաշինյանն անգամ ակնարկում է, որ մոլդովական որոշ սցենարներ կարող են կիրառվել հայաստանյան իրականության մեջ․ որոշ կուսակցությունների գրանցումը կարող է չեղարկվել, իսկ որոշերին՝ պարզապես արգելեն մասնակցել ընտրություններին։ Ընդ որում, իշխանությունները հիմքեր են ստեղծում այդպիսի քայլերի համար՝ հայտարարելով, թե կուսակցությունները պետք է ունենան առավել թափանցիկ ֆինանսավորում։

Փաշինյանի այս սպառնալիքներն անարձագանք չեն մնացել։ Ըստ լավատեղյակ աղբյուրների՝ ընդդիմությունն արդեն որոշ մեխանիզմներ է գործարկել։ Ընտրական պայքարին մասնակցող յուրաքանչյուր ուժ ունի իր կրկնակի տարբերակը, որն արդեն գրանցված է Պետռեգիստրում։ Բանն այն է, որ Հայաստանում գրանցված է 120-ից ավելի կուսակցություն, և եթե որևէ արմատական ուժի գրանցումն արգելվի, ընտրապայքարին կարող է միանալ դրա «դուբլյոր» տարբերակը՝ գործող իշխանություններին զրկելով մանևրելու հնարավորությունից։

Ըստ էության, մոլդովական փորձը շատ բան է սովորեցրել հայաստանյան ընդդիմությանը, իսկ Նիկոլ Փաշինյանի կողմից իր ռազմավարությունը նախապես բացահայտելը կարող է ի վերջո վատ ծառայություն մատուցել հենց իշխանությանը՝ հնարավորություն տալով «թույնի դեմ հակաթույն» գտնել։

Լուսինե Սաղաթելյան