Քահանաները ձերբակալվել են հավաք անցկացնելուն կամ դրան մասնակցելուն խոչընդոտելու համար․ ՔԿ

Արագածոտնի թեմի առաջնորդն ու 6 քահանաները, ինչպես նաև քաղաքացիական անձինք ձերբակալվել են իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով հավաք անցկացնելուն կամ դրան մասնակցելուն խոչընդոտելու կամ հարկադրելու համար: 24News-ի հարցմանն ի պատասխան հայտնեցին ՔԿ-ից:

«Ինչպես նաև հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելու դեպքի առթիվ նախաձեռնված քրեական վարույթի նախաքննության շրջանակներում կատարվում են վարութային և ապացուցողական անհրաժեշտ գործողություններ: Լրացուցիչ հանդես կգանք հայտարարությամբ»,- մանրամասնեց ՔԿ խոսնակ Կիմա Ավդալյանը:

24News-ը գրել էր, որ արդեն ՔԿ-ում են գտնվում Մկրտիչ Սրբազանը և 5 հոգևորականներ:

Հիշեցնենք, որ Հովհաննավանքի հոգևոր հովիվ Տեր Արամ քահանա Ասատրյանը Հանրային հեռուստաընկերության եթերում հայտարարել էր, որ իրեն ստիպել են մասնակցել հանրահավաքների:

Հիշեցնենք նաև, որ Տեր Արամը հերքել էր իր կապը քահանաների ձերբակալություններին․

«Այսինքն չհասկացա՞, ինչպես թե Սրբազանին և 5 քահանաների են ձերբակալել, ես ձեզանից եմ լսում նման բան։ Դա էլ եմ ձեզանից լսում, որ իմ հայտարարությունների հիման վրա է եղել: Ես կապ չեմ ունեցել որևէ մեկի հետ, քահանաներն էլ ինձ հետ կապ չեն ունեցել»,- ասել էր տեր Արամը։

Հասմիկ Սարգսյան

Մերի Մանուկյան