«Շողակաթը» կփակեն

Հայաստանի խորհրդարանն ընդունեց «Շողակաթ» հեռուստաընկերությունը փակելու նախագիծն ամբողջությամբ։ Իշխող «Քաղաքացիական պայմանագիր» խմբակցությունը 58 կողմ ձայնով հաստատեց այն։ Նախագծի հեղինակներից Թագուհի Ղազարյանը հայտարարել է, թե ստանալու են բյուջեի նախագծում և իրագործումը տեղի է ունենալու հունվարի 1-ից։

Հիշեցնենք՝ «Տեսալսողական մեդիայի մասին» ՀՀ օրենքում փոփոխություն անելու նախագիծը հեղինակել են ԱԺ «Քաղաքացիական պայմանագիր» խմբակցության պատգամավորներ Թագուհի Ղազարյանն ու Սիսակ Գաբրիելյանը։ ՔՊ–ական պատգամավորներն առաջարկում են կրճատել հանրային կարգավիճակ ունեցողներ հեռուստաալիքների թիվը՝ 3–ից դարձնելով 2։ Հանրային երեք ալիքներն են «Առաջին ալիքը»` որպես հիմնական հեռարձակող, հոգևոր-մշակութային «Շողակաթը» և «Լուրեր» լրատվական ալիքը։

Նախագծով նախատեսում է գործող օրենքով նախատեսված հանրային հեռարձակողների թիվը նվազեցնել՝ հասցնելով երկուսի՝ միևնույն ժամանակ վերացնելով նաև կրթական-մշակութային ուղղվածության ծրագիր պարունակելու պահանջը։ Օրինագծի հիմնավորումից պարզ է դառնում, որ խոսքը հոգևոր–մշակութային միակ հեռուստաընկերությունից՝ «Շողակաթ»-ից հրաժարվելու և այն հանրային հեռարձակողների շարքից դուրս թողնելու մասին է։

Ինչպես և սպասվում էր, գործող իշխանություններն ամեն ինչ անում են Հայ առաքելական եկեղեցուն հարվածելու համար, դրա համար չնայելով ոչնչի, և փակելով կարևորագույն նշանակության հեռուստաալիքը, որը միակն էր, որ հոգևոր և մշակութային բովանդակությունը փոխանցում։ Սա հարված է ոչ միայն Հայ առաքելական եկեղեցուն և Հայոց արժեքներին, այլ նաև իրական մշակույթին։ Արդյունքում հասարակությունը մնալու է դեգրադացնող Հանրային հեռուստաընկերության և իշխանության այլ լրատվամիջոցների հույսին։ Որևէ այլ բան այս իշխանությունից սպասել անհնար է։

Ելենա Տոնոյան