Փաշինյանը չարաշահելու է «խաղաղության» կեղծ դիսկուրսը

Ազգային ժողովում բյուջեի նախագծի քննարկման ժամանակ Նիկոլ Փաշինյանը հայտարարել է, թե 2026 թվականը վճռական նշանակություն է ունենալու խաղաղության համար։ «Հունիսին տեղի են ունենալու հերթական խորհրդարանական ընտրություններ, և այդ ընտրությունները, ըստ էության, ունեն մի առանցքային հարց, որի պատասխանը պետք է տրվի։ Եվ Հայաստանի Հանրապետության ժողովուրդը իր ընտրությամբ պետք է տեր կանգնի խաղաղությանը։ Սա, ըստ էության, այդ առաջիկա ընտրությունների առանցքային քաղաքական իմաստը և նպատակն է», - ասել է Նիկոլ Փաշինյանը։

Ավելի քան երեք տարի բանակցված հայ-ադրբեջանական խաղաղության պայմանագիրը Վաշինգտոնում ոչ թե ստորագրվեց, այլ նախաստորագրվեց։ Փաշինյանը փաստաթղթի ստորագրման հեռանկարից ոչինչ չի ասել, փոխարենը դարձյալ պնդել է՝ Հայաստանի և Ադրբեջանի միջև խաղաղություն է հաստատված։ Իսկ որպեսզի խաղաղությանը ոչինչ չսպառնա, Նիկոլ Փաշինյանը կարծում է՝ մարդիկ պետք է ընտրություններին կրկին ՔՊ-ին քվե տան։ «Հակառակը՝ Հայաստանը ետ գլորելն է կոնֆլիկտի և ֆորպոստի տրամաբանության մեջ», - ասել է նա։

Փաստացի, ինչպես և կանխատեսել էինք, Փաշինյանն ընտրությունների է գնում «ՔՊ կամ պատերազմ» կարգախոսով, որպեսզի սեփական ժողովրդին ահաբեկելով կարողանա կրկին վերարտադրվել։ Ընդդիմությունը, իհարկե, դեռ ունի ժամանակ և հնարավորություն՝ հանրությանը բացատրելու, որ Փաշինյանի կուսակցությունը ոչ թե «խաղաղության», այլ «նոր պատերազմի» կուսակցություն է, և ՔՊ-ին ձայն տալը նորանոր աղետներ է բերելու։ Բայց դեռևս այդ հարցում ընդդիմությունից գործողություններ չեն նկատվում։ Մինչդեռ հենց սա է լինելու խորհրդարանական ընտրությունների հիմնական առանցքը։

Լիլիա Արամյան