Ալիևն ու Էրդողանը կօգնե՞ն Փաշինյանին

Երևանը բանավոր հրավիրել է Ադրբեջանի և Թուրքիայի նախագահներին մասնակցել հաջորդ տարի Հայաստանի մայրաքաղաքում կայանալիք Եվրոպական քաղաքական համայնքի գագաթնաժողովին։ Արտգործնախարար Արարատ Միրզոյանը խորհրդարանում նշել է, որ փաստաթղթային հրավերներ դեռևս չեն ուղարկել։ Արդյոք Իլհամ Ալիևն ու Ռեջեփ Էրդողանը կժամանեն Երևան, ըստ նախարարի, դեռևս դետալները քննարկելու առիթ չի եղել։ Եվրոպական քաղաքական համայնքի 8-րդ գագաթնաժողովը Երևանում անցկացվելու է 2026 թվականի մայիսի 4-ին։

Թշնամական 2 պետությունների ղեկավարներին Հայաստան հրավիրելով, Նիկոլ Փաշինյանը կրկին ցանկանում է ակտիվացնել իր խաղաղության օրակարգի շուրջ խոսակցությունները, հանրությանը էլ համոզել, թե թշնամու հետ խաղաղություն է կնքվել։ Կայցելե՞ն արդյոք Էրդողանն ու Ալիևը Հայաստան՝ Փաշինյանին քարոզչության նոր հնարավորություններ տալու, դեռևս վաղ է խոսել։ Մեծ հավանականությամբ՝ այո, եթե անվտանգության անհրաժեշտ երաշխիքներ տրվեն, իսկ այդպիսիք անպայման հայկական կողմը պատրաստ է տրամադրել։

Նշված գագաթաժողովին եվրոպական երկրների բազմաթիվ առաջնորդներ են ժամանելու, և հենց խորհրդարանական ընտրությունների նախաշեմին նման միջոցառում կազմակերպելը Փաշինյանն օգտագործելու է իր քարոզչական նպատակների համար։ Սակայն բոլոր այդ այցերի մեջ առանցքայինը հենց Էրդողանի ու Ալիևի այցն է լինելու, ուստի հայկական կողմն ամեն ինչ անելու է, որպեսզի վերջիններիս այցը Երևան ապահովի։ Ընդ որում, մեծ հավանականությամբ ոստիկանությունը ամեն ջանք կգործադրի, որպեսզի Ալիևի և Էրդողանի դեմ բողոքի գործողություններ չլինեն, հակառակ պարագայում Փաշինյանի մտահղացումը ձախողվելու է։

Ալլա Տիգրանյան