Չի կարելի մեծ ցնծությամբ սպասել Թուրքիայի հետ սահմանի բացմանը, քանի որ դա ոչ մի լավ բան Հայաստանին չի տալու. Էդմոն Մարուքյան

Էդմոն Մարուքյանը տելեգրամյան իր ալիքում գրել է․ 

Չի կարելի մեծ ցնծությամբ սպասել Թուրքիայի հետ սահմանի բացմանը, քանի որ դա ոչ մի լավ բան Հայաստանին չի տալու։

Եթե համեմատենք Հայաստանի Հանրապետությունը Վրաստանի Հանրապետության հետ՝ նույնիսկ հաշվի առնելով, որ Վրաստանը ծով ունի, հանդիսանում է տրանզիտային հաբ և դրա շնորհիվ զգալի եկամուտներ է ստանում, ապա կհասկանանք՝ մենք լավ տնտեսական վիճակում ենք։

Սակայն մեզ դա չեն ասում, որպեսզի պահեն կախված այն մտքից, թե իբր մեր խնդիրների պատճառը Թուրքիայի հետ փակ սահմանն է, և որ հենց սահմանը բացվի՝ բոլորը լավ են ապրելու։ Իրականում, եթե Թուրքիայի հետ սահմանը բացվի, այն մարդիկ որոնք զբաղվում են մեր երկրի անվտանգության ապահովմամբ, չեն կարողանա դիմագրավել առաջացող մարտահրավերներին։

Հայաստանը չի կատարել իր «տնային աշխատանքը»՝ նախքան այդ սահմանը բացելը։ Անհրաժեշտ է նախ ընդունել համապատասխան օրենքներ, հաստատել սահմանափակումներ և իրականացնել անվտանգության ապահովման կոնկրետ քայլեր։

Եվ եթե ՀՀ իշխանությունները բանակցում են սահմանի բացման շուրջ, ապա նրանք պետք է այդ ամենն արդեն իրականացրած լինեին՝ մինչև բանակցությունների մեկնարկը։ Իսկ այս պահին ոչինչ չի արվում, քանի որ չգիտեն, թե ինչ է պետք անել, չեն հասկանում պարզապես։