ՆԱՏՕ-ի և Ռուսաստանի միջև պատերшզմը կարող է սկսվել մինչև 2029 թվականը. Գերմանիայի ՊՆ

Գերմանիայի պաշտպանության նախարար Բորիս Պիստորիուսը հայտարարել է, որ Ռուսաստանի զինված ուժերի աճը հաշվի առնելով՝ մնում է տեսական հնարավորություն, որ երկիրը կփորձի հարձակվել ՆԱՏՕ-ի երկրների վրա մինչև 2029 թվականը։

Նա նշել է, որ այդ պատճառով հատկապես կարևոր է մինչ այդ ժամկետը ապահովել պաշտպանունակությունը։ «Ռազմական փորձագետները ուշադիր հետևում են Ռուսաստանում տեղի ունեցող զարգացումներին։ Այնտեղ ռազմական արդյունաբերությունը զգալիորեն զարգանում է, արտադրվում են բազմաթիվ տանկեր և ինքնաթիռներ, ինչը նշանակում է, որ Ռուսաստանի զինված ուժերը զգալիորեն աճում են։ Մինչև 2026 թվականը նրանց թիվը, հավանաբար, կհասնի 1,5 միլիոն զինվորի», -ասել է Պիստորիուսը։

«Մենք պետք է ապահովենք մեր պաշտպանունակությունը մինչ այդ ժամկետը։ Այս խնդիրը, իհարկե, պահանջում է և՛ ժամանակ, և՛ գումար, բայց մենք ձգտում ենք հասնել մեր նպատակին», – ընդգծել է նա։

Գերմանական հետախուզության անցյալ տարվա վերջին ներկայացված տվյալները ցույց էին տալիս, որ ռուսական բանակը կարող է հարձակվել ՆԱՏՕ-ի երկրների վրա մինչև 2030 թվականը։