Մինսկի խումբը կլուծարվի

Մինսկի խումբն իր գործունեությունը պաշտոնապես կավարտի դեկտեմբերի 1-ին, տեղեկացրել են ԵԱՀԿ-ից։ «2025 թվականի սեպտեմբերի 1-ին Նախարարների խորհրդի կողմից կայացված որոշման համաձայն՝ քայլեր են ձեռնարկվում Մինսկի գործընթացի դադարեցման ուղղությամբ»,- նշել են կազմակերպության ներկայացուցիչները՝ հավելելով, որ այդ գործընթացը կավարտվի դեկտեմբերի 1-ին։

Այդ օրվանից սկսած Մինսկի գործընթացի շրջանակներում և այդ պրոցեսի հետ կապ ունեցող կառույցներում իրականացվող բոլոր գործողությունները կդադարեցվեն։ Մինսկի խմբի լուծարումն Ադրբեջանի առանցքային պահանջներից մեկն էր։ Այդկերպ, Բաքուն շտապում էր փակել արցախյան հիմնախնդիրը, զրկել Հայաստանին երբևէ Արցախի և արցախահայության հարցը բարձրացնելու հնարավորությունից։

ՀՀ իշխանությունները տևական ժամանակ չէին արձագանքում, բայց հետո առանց այլևայլությունների համաձայնվեցին Ալիևի պահանջին։ Օգոստոսին Վաշինգտոնում հռչակագրի ստորագրման արարողությանը հայկական և ադրբեջանական պատվիրակությունները հայտարարեցին խմբի լուծարման աջակցելու, համապատասխան փաստաթուղթ ներկայացնելու։

Որքան էլ հայաստանյան ընդդիմությունն ու իրավապաշտպանները հայտարարություններ էին տարածում, ակնհայտ էր, որ Մինսկի խմբի անդամ երկրներին էլ ձեռնտու էր նման զարգացումը՝ մեկընդմիշտ փակել Արցախի հարցը և ազատվել գլխացավանքից։ 

Աննա Մարգարյան