Ոչ ոք չի հավատում Փաշինյանին ու իր ԱԱԾ-ին

Իշխող «Քաղաքացիական պայմանագիր» կուսակցությանը պատկանող լրատվամիջոցը երեկ իբր ԱԱԾ-ից ստացած փաստաթուղթ է հրապարակել՝ պնդելով, թե Ամենայն հայոց կաթողիկոսի եղբայրը՝ Եզրաս արքեպիսկոպոս Ներսիսյանը, 80-ականներին հավաքագրվել է սովետական ՊԱԿ-ի կողմից։ Հայերեն լրացված այդ փաստաթղթից կարելի է ենթադրել, որ այն գաղտնազերծվել է 2001 թվականին: Ուշագրավը հրապարակման պահն է, որ իշխանություններն, այն էլ ՔՊ-ին պատկանող ԶԼՄ-ով են արտահոսք կազմակերպում, մինչդեռ օրեր շարունակ նույն ԱԱԾ-ն հրաժարվում էր տեղեկություն հաստատել կամ հերքել մյուս լրատվամիջոցներին։

Իսկ դա արդեն իսկ խիստ կասկածելի է, հրապարակված գրությունն էլ հասարակության լայն զանգվածներն ընդունեցին հեգնանքով, չհավատալով։ Առավել ևս, որ Եզրաս Սրբազանին մեղադրում են 1986-88թթ. ՊԱԿ-ի հետ համագործակցելու մեջ։ Հայաստանը, հիշեցնենք, այդ ժամանակ ԽՍՀՄ կազմում էր, մեկ ընդհանուր պետության մեջ։ Գրեթե նույնն է, ինչ Արարատ Միրզոյանի դեպքում, ով հավաքագրվել էր ՀՀ ԱԱԾ-ի կողմից։ Մյուս կողմից, իշխանությունների փնթի քայլերը, տոտալ անվստահությունը Նիկոլ Փաշինյանի և նրա թիմի նկատմամբ, վերջիններիս անհավասարակշռության և պոպուլիզմի պատճառով այլևս վստահություն չկա անգամ հատուկ ծառայությունների նկատմամբ, որոնք վաղուց դարձել են ոչ թե պետության, այլ մեկ անձի անվտանգության պաշտպանը։ Ուստի այս դեպքում էլ «բացահայտումը» որևէ արդյունք ունենալ չի կարող, առավել ևս, որ «փաստաթուղթը» նույնիսկ մասնագետների համար է խնդրահարույց։

Լուիզա Մուրադյան