Սպառնալուց էլ պետք է խելքով սպառնալ․ Խաչիկյանը անդրադարձել է իր վրա հարձակման մասին կեղծ լուրերին

Քաղաքագետ Արթուր Խաչիկյանը գրում է․ «Է՜հ, ժողովուրդ, ժողովուրդ… Սպառնալուց էլ պետք է խելքով սպառնալ։

Երեկ ֆեյսբուքյան կեղծ էջից սուտ լուր տարածվեց, թե իբր իմ վրա հարձակում է կատարվել, ընդ որում՝ ՄՈՍԱԴ-ի կողմից, այն էլ՝ հեծանիվ քշելիս։ Դրանից առաջ էլ լուր էր տարածվել, թե միաժամանակ ինձ որսում է ՀԱՄԱՍ-ը։

Ժողովուրդ, ազնիվ խոսք, էս ի՞նչ մանկապարտեզ է։ Եթե սպառնում եք, գոնե խելքին մոտ մի բան արեք, որ մարդ գոնե մի պահ մտածի։​

Ո՞նց կարող են ՀԱՄԱՍ-ն ու ՄՈՍԱԴ-ը միաժամանակ ցանկանալ հարձակվել ինձ վրա։ Չէ՞ որ նրանք երդվյալ թշնամիներ են։ Մի՞թե սա էլ պետք է ձեզ բացատրել։ ՀԱՄԱՍ-ը կազմակերպություն է, որն աշխարհի շատ երկրներում ճանաչված է որպես ահաբեկչական և կառավարում է Գազայի հատվածը 2007 թվականից։ Նրա պաշտոնական անվանումն է «Հարաքաթ ալ-մուքավամա ալ-իսլամիյա» («Իսլամական դիմադրության շարժում»)։ ՀԱՄԱՍ-ը պատասխանատու է Իսրայելի վրա կատարված բարբարոսական հարձակման համար, որից հետո սկսվեց պատերազմը Գազայի հատվածում և Գազայի խաղաղ բնակչության բարբարոսական բնաջնջումը։ Իսկ ՄՈՍԱԴ-ը Իսրայելի ազգային հետախուզական ծառայությունն է՝ ՀԱՄԱՍ-ի երդվյալ թշնամին։ Նրանք զբաղվում են հետախուզությամբ և հակաահաբեկչական գործողություններով ամբողջ աշխարհում։

Գրել, թե երկու կազմակերպությունն էլ ուզում են ինձ «վերացնել», նույնն է, թե գրել, որ Իրանի Իսլամական Հանրապետության պատվիրակությունը ժամանել է սիոնիզմի միջազգային համաժողովին։ Մի՞թե նման բաներն էլ պետք է ձեզ բացատրել։

Եվ հետո, ինչո՞ւ հեծանվով։ Ես մեքենա ունեմ։ Հեծանիվ շատ հազվադեպ եմ քշում, այն էլ՝ երբ խցանումները շատ են լինում։

Եվ վերջապես, ինչո՞ւ եք այդքան նյարդայնանում։ Գուցե ինչ-որ բանից վախենո՞ւմ եք։ Թե՞ ձեր վարկանիշն այնքան է ընկել, որ ստիպված եք բացահայտ սպառնալ ձեր ընդդիմախոսներին։

Մանկապարտեզ եք, ազնիվ խոսք»։