Առաջին քայլով ստեղծելու ենք 300 հազար նոր աշխատատեղ Հայաստանում. Սամվել Կարապետյանի 5 տնտեսական քայլերը

«Մեր անկախության 35-րդ տարին է, և մեր  երկիրն ընդգրկված է աշխարհի 110 աղքատ երկրների ցանկում։ Այսօր մեր երկիրն ունի լավարկման ու մեծ բարեփոխման կարիք»,-Սամվել Կարապետյանի տնտեսական ծրագրի շնորհանդեսի ընթացքում հայտարարեց «Մեր ձևով» շարժման համակարգող Նարեկ Կարապետյանը։

Նա ընդգծեց, որ մինչ այս մեր երկրի բերափոխումներն իրականացվել են ուրիշ օրակարգերի շուրջ։

«Մենք գիտենք, որ մեր երկրի անկախության առաջին 20-28 տարին բարեփոխումները եղել են անվտագային օրակարգի շուրջ, դրանից հետո 7-8 տարին՝ երևի հակասությունների օրակարգի շուրջ, իսկ այդ ընթացքում մենք ունենում էինք մի խնդիր, որ քչերն են նկատում, մարդիկ, որ դա զգում են իրենց վրա։ Դա թուլացող Հայաստանն է, որի բնակչությունը շրջաններից ուղղակի դուրս է գալիս։ Երևանցիները գնում են ԱՄՆ, շրջաններից գնում են Ռուսաստանի Դաշնություն։ Մեր երկրի բնակչութունը կես մլնով քչացել է անկախությունից հետո։ Շարունակում է անկում ապրել»,-իրավիճակը նկարագրեց Նարեկ Կարապետյանը։

Գործարար, բարերար Սամվել Կարապետյանն առաջարկում է 5 տնտեսական քայլ, որն իրականացնելու պարագայում փոխվելու է մեր հայրենքիի կյանքը։

«Քայլերը մշակված են տարիների աշխատանքի արդյունքում, պետական համակարգում մինչ այս եղած երկրի ղեկավարները, միշտ պետական ապարատի կողմից են նայել տնտեսությանը, առաջին ղեկավարը, որ կնայի ձեռնարկատերերի, հասարակության անդամի կողմից, կլինի Սամվել Կարապետյանը։ Ամենառաջին քայլը, բոլոր շրջաններում մենք տեսնում ենք մեկ հիմնական խնդիր, երկրում կա աշխատատեղերի խնդիր, շրջաններում գործ չկա։ Դրա պատճառով մարդիկ մեկնում են արտերկիր, ընտանիքները թողնում են այստեղ, ինչի պատճառով ունենում ենք բազմաթիվ բացասական հետևանքներ։ Այս բոլորի լուծման ճանապարհը պետությունը տվել է սուբսիդիաների տեսքով։ Մենք տեսնում ենք, որ վերջին տարիներին շրջաններում արտադրությունը, արդյունաբերությունն անկում են ապրել։ Մենք ինչ որ տեսնում ենք Երևանում, վարկերի հիրմքով ստեղծված տնտեսություն է, որը չի կարողանա երկար տեմպը պահպանել։ Ի՞նչ ենք մենք առաջարկում, առաջին քայլը, ստեղծել 300 հազար նոր աշխատատեղ Հայաստանում»,-հայտարարեց Ն. Կարապետյանը, ինչին հետևեցին ծափահարություններ։

Բանախոսն ընդգծեց, դրա համար ունեն մշակված քաղաքականություն, որի հիմքում ընկած են  վերարադյունաբերականացումը, ծառայությունների արտահանում և այլն։

Նշենք, որ շնորհանդեսի  շրջանակում նախատեսվում է ծրագրի ներկայացում, ինչպես նաև պանելային քննարկում և հարցուպատասխան՝ տնտեսագետների և մասնագիտական հանրույթի ներկայացուցիչների մասնակցությամբ։