«Հանրապետությունը» կգնա միայնակ

«Հանրապետություն» կուսակցության քաղաքական խորհրդի ընդլայնված նիստում երեկ որոշվել է, որ կուսակցությունը մասնակցելու է 2026 թ. հունիսի 7-ին կայանալիք խորհրդարանական ընտրություններին։ Այս մասին տեղեկացնում է «Հանրապետություն» կուսակցության քաղաքական խորհուրդը՝ նշելով, որ նախընտրական շտաբի պետ կլինի կուսակցության անդամ, Դավթաշեն վարչական շրջանի ղեկավար Ալբերտ Հովասափյանը։

Ամիսներ շարունակ մամուլը և փորձագետները փորձում էին կանխատեսումներ անել՝ ի վերջո հայաստանյան հաստիքային արևմտամետ ուժերը խորհրդարանական ընտրությունների կգնա՞ն մեկ միասնական դաշինքով, թե՞ առանձին-առանձին՝ այդպես ջլատելով սեփական ընտրազանգվածը։ Փաստացի, «Հանրապետություն» կուսակցությունը իր այս հայտարարությամբ ակնարկում է, որ ընտրություններին մտադիր են մասնակցել միայնակ, առանց այլ ուժերի։ Լավագույն դեպքում կարող են տարբեր քաղաքական ուժերի, օրինակ՝ «Հանուն հանրապետության» կուսակցության ներկայացուցիչներին, ինչպես և քաղհասարակության ներկայացուցիչներին ընդգրկել իրենց համամասնական ընտրացուցակում՝ նրանց ևս խորհրդարան տանելով։ Այդուհանդերձ, արևմտամետների ճամբարում առկա հավակնությունները, ինչպես նաև լուրջ տարաձայնությունները խոսում են այն մասին, որ նրանք ընտրությունների կգնան առանձին։

Սա, ի դեպ, բոլորովին չի բխում գործող իշխանությունների շահերից, որոնց միակ դաշնակիցը մնացած Արամ Սարգսյանն ու Արման Բաբաջանյանը կարող են պարզապես դուրս մնալ խորհրդարանից և այդ դեպքում շատ ավելի կամրապնդվի ընդդիմության դիրքերը։ Վաղարշապատի ընտրություններում «Հանրապետություն» կուսակցությունը 3․9 % քվե էր ստացել, և այժմ Արամ Սարգսյանին թերևս թվում է, թե իրեն կհաջողվի միայնակ հաղթահարել 4 տոկոսի սահմանագիծը և անցնել խորհրդարան։ Այդ դեպքում ոչ թե գործընկերների կտանեն Ազգային ժողով, այլ սեփական թիմով ներկայացված կլինի այնտեղ։ Իհարկե, սա ավելի շուտ ինքնախաբեություն է, քան լուրջ հաշվարկ։ Փաշինյանի կույրաղիքը դարձած «Հանրապետություն» կուսակցությունը, ինչպես և մյուս արևմտամետները, բավարար հեղինակություն չունեն, որպեսզի կարողանան խորհրդարան անցնել՝ հաղթելով ընդդիմության տարբեր թևերի, բայց և հստակ հասկանում են, որ դաշինքով գնալու դեպքում իրենց վիճակն ավելի բարդ կլիներ։

Հիշեցնենք, խորհրդարան անցնելու համար գործում է, դաշինքների դեպքում գործում է 7%, կուսակցությունների դեպքում՝ 4% նվազագույն սահմանաչափ։ Ուստի և «Հանրապետություն» կուսակցության որոշումը՝ գնալ միայնակ կամ էլ իրենց հետ տանել այլ կուսակցությունների և քաղգործիչների, շատ ավելի շուտ վկայում է, որ այս ուժերը պարզապես ցանկանում են խորհրդարան անցնել՝ հաղթահարելով նվազագույն շեմը և փոքր խմբակցություն ստեղծել։

Լուիզա Բադալյան