Իսրայելը Ռաֆահի անցակետը կբացի վերջին պատանդի աճյունի վերադարձից հետո

Իսրայելի վարչապետ Բենիամին Նեթանյահուի գրասենյակը հայտարարել է, որ Իսրայելը կվերաբացի Գազայի հատվածի և Եգիպտոսի միջև գտնվող Ռաֆահի անցակետը, երբ ավարտի վերջին մահացած պատանդի՝ սերժանտ Ռան Գվիլիի մարմինը վերադարձնելու ռազմական գործողությունը։

«Արմենպրես»-ի փոխանցմամբ՝ այս մասին հաղորդում է The Times of Israel-ը։Հայտարարությունն արվել է այս հարցի շուրջ անվտանգության կաբինետի նիստից հետո, Ռաֆահի անցակետը վերաբացելու միջազգային զգալի ճնշման ֆոնին։Նեթանյահուի գրասենյակը հայտարարության մեջ նշում է, որ Եգիպտոսի և Գազայի միջև միակ անցակետի բացման համար առաջադրված էր այն պայմանը, որ պետք է վերադարձվեին «բոլոր ողջ մնացած պատանդները», և ՀԱՄԱՍ-ը պետք է «100% ջանքեր գործադրեր՝ գտնելու և վերադարձնելու բոլոր սպանված պատանդներին»։Նաև ընդգծվում է, որ Իսրայելը կանի ամեն բան Գվիլիի աճյունը վերադարձնելու համար։

«Այդ գործողությունն ավարտվելուց հետո և ըստ Միացյալ Նահանգների հետ ունեցած համաձայնության՝ Իսրայելը կվերաբացի անցակետը», – ասվում է հայտարարության մեջ։

Չնայած Նեթանյահուի գրասենյակի հայտարարության մեջ Գվիլիի մարմինը վերադարձնելու նպատակով Իսրայելի պաշտպանության բանակի (ԻՊԲ) գործողության կոնկրետ ժամանակացույց չի նշվել, սակայն ԱՄՆ մի պաշտոնյա, որի անունը չի նշվում, The Times of Israel-ին ասել է, որ Վաշինգտոնն ակնկալում է, որ որոնումները կտևեն մի քանի օր, ինչը թույլ կտա Ռաֆահի վերաբացումը կատարել այս շաբաթվա վերջին։

ԻՊԲ-ն հունվարի 25-ի երեկոյան հայտնել է, որ որոնում է Գվիլիի մարմինը Գազա քաղաքի արևելքում գտնվող գերեզմանատանը։24-ամյա ոստիկան Գվիլին զոհվել է ՀԱՄԱՍ-ի կողմից Իսրայելի հարավում գտնվող Ալումիմ կիբուցի պաշտպանության ժամանակ՝ 2023 թվականի հոկտեմբերի 7-ին տեղի ունեցած հարձակման ընթացքում, որից հետո սկսվեց պատերազմը Գազայի հատվածում։Բոլոր պատանդների վերադարձը՝ ողջ թե մահացած, 2025 թվականի հոկտեմբերի 10-ին ուժի մեջ մտած հրադադարի համաձայնագրի առաջին փուլի հիմնական պայմանն էր։ Վերջին պատանդի մարմինը վերադարձվել է դեկտեմբերի սկզբին։