ԱՄՆ-ը Հնդկաստան է վերադարձրել տասնամյակներ առաջ գողացված քանդակները

Սմիթսոնյան ինստիտուտի Ասիական արվեստի ազգային թանգարանը Հնդկաստան է վերադարձրել միջնադարյան երեք բրոնզե քանդակներ, երբ ներքին հետաքննությունը հաստատել է դրանց անօրինական տեղափոխումը տաճարներից, գրում է բրիտանական The Independent-ը։

Խոսքը վերաբերում է 10-րդ դարի «Շիվա Նատարաջա», 12-րդ դարի «Շիվա Սոմասկանդա» և 16-րդ դարի «Սունդարարը կնոջ՝ Պարավայի հետ» արձաններին։ Բոլորն էլ Հնդկաստանից դուրս են բերվել 20-րդ դարի կեսերին։ Պոնդիչերիի ֆրանսիական ինստիտուտի արխիվային գրառումներն ու լուսանկարները, որոնք փաստաթղթավորել են Թամիլ Նադուի տաճարներում գտնվող արձանները 1956-1959 թվականներին, հաստատում են անօրինական տեղափոխումը։

Երկու բրոնզե քանդակներն ամբողջությամբ կվերադարձվեն հայրենիք, իսկ «Շիվա Նատարաջա»-ն («Պարող Շիվա») կմնա ցուցադրված Վաշինգտոնում՝ ըստ Հնդկաստանի հետ երկարաժամկետ համաձայնագրի։