Ի՞նչ են ցույց տալիս Ռոբերտ Քոչարյանի ասուլիսի դիտումներն ու արձագանքները. «Փաստ»

«Փաստ» օրաթերթը գրում է.

Հունվարի 29-ին մամուլի ասուլիսով հանդես եկավ ՀՀ երկրորդ նախագահ Ռոբերտ Քոչարյանը և անդրադարձավ բազմաթիվ թեմաների՝ աշխարհում տիրող խառը իրավիճակ և աշխարհակարգի փոփոխություն, կենտրոնացավ, այսպես կոչված, «Թրամփի ուղի» նախագծին, օգուտներին, ակնհայտ և հավանական խնդիրներին, ներքաղաքական խնդիրների՝ ընտրություններ, վերադասավորումներ, հնարավոր դաշինքներ, իր մասնակցությանը և այլն։ Երկրորդ նախագահը նաև անդրադարձավ սոցիալական անհավասարության խնդրին՝ ցածր թոշակի և պաշտոնյաների ճոխ պարգևատրման հակադրությանը և այլն։

Ռոբերտ Քոչարյանի ասուլիսին հրավիրվել էին ավելի քան 3 տասնյակ լրատվամիջոցներ՝ տարբեր դիրքավորումների և տարբեր ուղղվածության, այդ թվում՝ իշխանական։ «Փաստը», ինչպես նախորդիվ, այս անգամ էլ մշտադիտարկեց երկրորդ նախագահի՝ ավելի քան 3 ժամ տևած ասուլիսի ամբողջական և հատվածաբար հրապարակումների դիտումները։ Նշենք, որ ասուլիսը լայնորեն լուսաբանվել է ոչ միայն մասնակցություն ունեցած լրատվամիջոցներում։

Մենք դիտարկել ենք լրատվամիջոցների ընդամենը մի մասում ասուլիսի դիտումները և արձագանքները։ Մեր ուսումնասիրած հարթակներում երեկվա՝ փետրվարի 6-ի ժամը 12։00-ի դրությամբ դիտումների թիվը գերազանցում է 7 մլն 900 հազարը։ Ուղիղ հեռարձակմամբ դիտումների թիվը կազմում է շուրջ 400 հազար։

Արձագանքները և մեկնաբանությունները ևս բավական շատ են, առավելապես՝ դրական. ֆեյքային գրառումները մի կողմ՝ իրական օգտատերերի մեկնաբանությունները պարունակում են հիմնականում կոչեր, առաջարկներ, սպասումներ, քննադատություն-անհամաձայնություններ, հակափաստարկներ, իսկ հիմնականում՝ համաձայնություն։

«Փաստը» ուշի ուշով հետևում է քաղաքական տարբեր ուժերի առաջնորդների, հայտնի գործիչների հրապարակային ակտիվությանը, ելույթներին, հարցազրույց-ասուլիսներին, և Ռոբերտ Քոչարյանի պարագայում գործ ունենք հետաքրքիր ֆենոմենի՝ հետաքրքրության առումով բացառիկ կայունության հետ։

Մանրամասները՝ «Փաստ» օրաթերթի այսօրվա համարում