Թուրքիան արագացնում է հայ–թուրքական սահմանի բացման աշխատանքները

Թուրքիայում արագացրել են Հայաստանի հետ սահմանային անցակետի բացման աշխատանքները։ Թուրքական Yeşil Iğdır Gazetesi պարբերականի փոխանցմամբ՝ Իգդիրի նահանգապետ Ֆիրաթ Թաշոլարն անձամբ ծանոթացել է Ալիջանի սահմանային անցակետի («Մարգարա» անցակետ Հայաստանի կողմից – խմբ.) վերակառուցման և արդիականացման ընթացիկ աշխատանքներին։ Թաշոլարը հայտարարել է, որ գործընթացը նախատեսվում է ավարտել կարճ ժամկետում։

Նախորդ ամիս էլ հաղորդվել էր, որ «Ալիջան» անցակետում աշխատանքները 90 տոկոսով ավարտված են։ Կառուցվել են սահմանապահ և մաքսային գործառույթների համար նախատեսված շինություններ, տեղադրվել են գովազդային պաստառներ, որոնք պետք է խրախուսեն Հայաստանից Թուրքիա ժամանողներին այցելել Իգդիր և հարակից շրջաններ։ 2026 թվականի հունվարի 1-ից երկու երկրների դիվանագիտական, ծառայողական և հատուկ անձնագիր կրող անձինք կարող են անվճար էլեկտրոնային վիզա ստանալ։

Օրերս Թուրքիայի խորհրդարանի նախկին պատգամավոր Կարո Փայլանը X-ի իր էջում գրել էր, որ հայ–թուրքական սահմանը կբացվի մարտին։

«Թուրքիա–Հայաստան սահմանային անցակետի՝ երրորդ երկրների քաղաքացիների համար բացումը սպասվում է մարտ ամսին։ Ադրբեջան–Հայաստան խաղաղության գործընթացի կայունացումը մեծապես կախված է այն քայլերից, որոնք առաջիկայում կձեռնարկի Թուրքիան»,- գրել է Փայլանը։

Ուշագրավ է, որ սահմանային անցակետի բացման աշխատանքների արագացման մասին լուրը հայտնվեց Ադրբեջանի և Թուրքիայի արտաքին գործերի նախարարների միջև տեղի ունեցած հեռախոսազրույցից հետո։ Ջեյհուն Բայրամովն ու Հաքան Ֆիդանը քննարկել են տարածաշրջանային անվտանգային իրավիճակը։ Հեռախոսազրույցի ընթացքում անդրադարձ է կատարվել երկկողմ հարաբերություններին, մտքեր են փոխանակվել Մերձավոր Արևելքում ստեղծված իրավիճակի, Ադրբեջան–Հայաստան հարաբերությունների կարգավորման գործընթացի, ինչպես նաև փոխադարձ հետաքրքրություն ներկայացնող այլ հարցերի շուրջ։

Թուրքիան սահմանի բացումը և հայ–թուրքական հարաբերությունների կարգավորումը մշտապես շաղկապել է հայ–ադրբեջանական հարաբերությունների կարգավորման հետ, և ԱՄՆ փոխնախագահ Վենսի այցից առաջ նման քայլերը վկայում են, որ լուրջ գործընթացներ են ընթանում։ Միևնույն ժամանակ, սա նաև աջակցություն է Փաշինյանին՝ խորհրդարանական ընտրություններից առաջ։

Աննա Մարգարյան