Team-ի և Ֆրանսիական համալսարանի համագործակցությամբ 120 ուսանող իր ուժերն է փորձել առաջատար ընկերություններում

12-ը փետրվարի, 2026 թ․, Երևան․ Team ընկերությունների խումբը, կարևորելով կրթական ծրագրերի իրականացումն ու նոր սերնդի մասնագետների զարգացումը, Հայաստանում ֆրանսիական համալսարանի հետ համագործակցությամբ, շուրջ 120 ուսանողի աշխատանքային փորձառության հնարավորություն է տվել խմբի տարբեր ընկերություններում:

Համալսարանի մարքեթինգի ֆակուլտետի ուսանողներն ամիսներ շարունակ Team Telecom Armenia-ի, Team Solutions-ի և Buy.am-ի պրոֆեսիոնալ մասնագետների առաջնորդությամբ գործնական գիտելիքներ ու հմտություններ են ձեռք բերել նշված ընկերությունների մարքեթինգային ստորաբաժանումներում: Նախագծի ամփոփիչ միջոցառմանը, որին ներկա էր նաև Ֆրանսիական համալսարանի ռեկտոր Սալվա Նակուզին, ուսանողներն արժանացել են հավաստագրերի Team-ի կողմից:

Սա Team-ի և Հայաստանում ֆրանսիական համալսարանի հերթական հաջող համագործակցությունն է, որի նպատակն է ուսանողներին տրամադրել իրական աշխատանքային միջավայրում իրենց գիտելիքները կիրառելու, փորձ ձեռք բերելու և հետագայում աշխատաշուկա առավել սահուն մուտք գործելու հնարավորություն:

«Team ընկերությունների խմբում այս տարիների ընթացքում արդեն իսկ աշխատանքի է անցել կամ փորձնակ եղել Ֆրանսիական համալսարանի շուրջ 50 նախկին ու ներկա ուսանող, և ուրախ ենք, որ այս ճանապարհը շարունակական է: Մենք՝ որպես Հայաստանի խոշոր գործատու, նաև մեր սոցիալական պարտավորությունն ենք համարում նման նախաձեռնությունների իրականացումը՝ զարգացնելու բիզնես-կրթություն համագործակցությունը և ստեղծելու արդյունավետ միջավայր գալիք մասնագիտական սերնդի համար՝ տալով ինքնադրսևորման և փորձի ձեռքբերման հնարավորություն իրական աշխատանքային միջավայրում: Ուրախ ենք, որ կարողանում ենք նպաստել երիտասարնդերի ոգեշնչմանն ու տեսնել նրանց թարմ գաղափարները աշխատանքում»,-ասում է Team ընկերությունների խմբի HR տնօրեն Աննա Հովսեփյանը:

«Team-ի հետ համագործակցությունն այս նախագծի շրջանակում անցել է բազմաթիվ բարդ և անհրաժեշտ փուլեր, որոնցից կարևորագույնն էր ուսանողներին հանձնարարվող առաջադրանքների համապատասխանեցումը ուսումնական ծրագրերի բովանդակությանը և, նախագծի ավարտին, ակնկալվող արդյունքների հստակ կապի ապահովումը դասընթացի վերջնարդյունքների հետ: Նախագծահեն (PBL- project-based learning) ուսուցումը ՀՖՀՀ մարքեթինգի ֆակուլտետում իրականացվում է շուրջ 15 տարի, սակայն այս նախագիծը տարբերվող էր և յուրահատուկ, քանի որ ընդգրկում էր երեք մասնագիտական դասընթացներ միաժամանակ, ինչը հնարավորություն տվեց ուսանողներին հասկանալու մարքեթինգային գործընթացի ողջ տրամաբանությունը, տեսնելու, թե ընկերության մարքեթինգային իրական առաջադրանքների տարբեր բաղադրիչներն ինչպես են փոխկապակցված, ինչպես են հաջորդաբար ստացված արդյունքերն ազդում միմյանց վրա: Team-ի ներգրավվածությունը ուսումնական գործընթացներին հնարավորություն տվեց ուսանողների մոտ ձևավորելու գործնական հմտություններ և մասնագիտական մտածողություն, որոնք լիովին համահունչ են արդի շուկայական պահանջներին.»,-նշում է Հայաստանում ֆրանսիական համալսարանի մարքեթինգի ֆակուլտետի դեկան Նաիրա Հայրապետյանը:

Այս համագործակցության արդյունքում ուսանողներից Լիլյա Բաղդասարյանն աշխատանքի է անցել Team Systems ընկերությունում՝ որպես սոցիալական մեդիայի մասնագետ:

«Ինձ համար կարևոր էր, որ այս փորձառության ընթացքում մենք ուսումնասիրում էինք իրական իրավիճակներ, լուծումներ փնտրում ու առաջարկում ոչ թե վերացական, այլ շոշափելի խնդիրների համար և կիրառում համալսարանում ստացած մասնագիտական գիտելիքները: Սա հնարավորություն էր հասկանալու՝ ինչպես կարձագանքենք աշխատանքային տարբեր իրավիճակներին, երբ անհրաժեշտ են հենց գործնական լուծումներ: Կարևոր էր մեր հանդեպ փորձառու մասնագետների վստահությունն ու աջակցությունը, ինչն առավել արդյունավետ դարձրեց այս ամիսների աշխատանքը»,-ասում է Լիլյա Բաղդասարյանը:

Team-ը շարունակելու աջակցել կրթության և մարդկային ներուժի զարգացմանը՝ նպաստելով իրական աշխատանքի մարտահրավերներին պատրաստ սերնդի ձևավորմանն ու աշխատաշուկայում երիտասարնդերի ինտեգրմանը:

Top of Form

Bottom of Form

Team ընկերությունների խմբի մասին

Team ընկերությունների խումբը միավորում է Team Telecom Armenia, Team Pay, Team Systems, Team Solutions CJSC, Buy.am, Grand Hotel Yerevan, TMW, Northern Terroir, Team Construct, Team Logistics, ServiceHUB ընկերությունները՝ գործունեություն ծավալելով հեռահաղորդակցության, ՏՏ, ֆինանսական, հյուրանոցային և մի շարք այլ ոլորտներում։