«…Մեր կյանքում աղոթքը երբեք չպետք է դադարի…». Տեր Մանուկ քահանա Զեյնալյան

Արագածոտնի թեմի հոգևոր դասը, միանձնուհիներն ու հավատավոր զավակները կրկին մեկտեղվել էին միասնական աղոթքի, այս անգամ Արուճի Սուրբ Աստվածածին եկեղեցում:

Ներկաները միասնաբար աղոթք բարձրացրեցին տնային կալանքում հանիրավի գտնվող սիրելի Առաջնորդ Մկրտիչ Սրբազանի, անազատության մեջ գտնվող հոգևոր հայրերի, եղբայրների և զավակների, գերեվարված հայորդիների, հայրենիքի ու Սուրբ Եկեղեցու համար:

Ընթացս Ժամերգության իր խոսքը ներկաներին փոխանցեց Արուճի հովվության հոգևոր հովիվ՝ Արժանապատիվ Տեր Մանուկ քահանա Զեյնալյանը:

Տեր Հայրն հորդորեց հավատացյալներին համբերատար ու անդադար աղոթել՝ վստահեցնելով, որ Աստծուն ուղղված անկեղծ աղոթքը երբեք անպատասխան չի մնում և Տիրոջ ողորմած պատասխանը չի ուշանում։

Արագածոտնի մարզի առաջին ատյանի ընդհանուր իրավասության դատարանը, Թեմակալ Առաջնորդ Գերաշնորհ Տեր Մկրտիչ եպիսկոպոս Պռոշյանի կալանքը փոխարինել է տնային կալանքով:

Հայր Սուրբը ժամերգության ավարտին ներկաներին փոխանցեց Սրբազան Հոր օրհնությունն ու երախտագիտությունը՝ նշելով, որ Սրբազան Հայրը իր շնորհակալությունը փոխանցել է Սուրբ Պողոս Առաքյալի խոսքերով․ «Ես բանտում էի, և դուք աղոթում էիք ինձ համար»։ Միաժամանակ Հայր Սուրբը փոխանցեց նաև Սրբազան Հոր հորդորը՝ շարունակել աղոթել անազատության մեջ գտնվող հոգևորականների և բոլոր հայորդիների համար։

Միասնական ժամերգությունն ավարտվեց Հայր Սուրբի Պահպանիչ աղոթքով:

Սիրելի հավատացյալներ, տեղեկացնում ենք, որ Մեծ Պահքի ընթացքում միասնական ժամերգությունները տեղի կունենան ուրբաթ օրերին:

Փետրվարի 20-ին, ժամը 19:00-ին, միասնական ժամերգությունը տեղի կունենա Կարմրաշենի Սուրբ Աստվածածին եկեղեցում(Թալինի տարածաշրջան):