Ալիևի պատասխանը Վենսին. Ռուբեն Վարդանյանին դատապարտեցին

Բաքվի դատարանն ապօրինաբար գերության մեջ պահվող Արցախի նախկին պետնախարար, բարերար Ռուբեն Վարդանյանին դատապարտել է 20 տարվա ազատազրկման։ Արցախի նախկին պետնախարարի գործն առանձին էին քննում, նրան էլ այնպիսի անհեթեթ մեղադրանքներ էին ներկայացվել, որ որևէ տրամաբանության մեջ չեն տեղավորվում։ Վարդանյանի վճիռը հրապարակվել է Ադրբեջանի նախագահի՝ օրերս France 24-ին տված հարցազրույցից հետո։ Իլհամ Ալիևը հայտարարել էր, թե Բաքվում պահվող հայ գերիները չեն ազատ արձակվելու և որևէ ներում չի նախատեսվում։

«Այդ մարդիկ լուրջ հանցանքներ են կատարել մարդկության դեմ։ Պատկերացրեք՝ Երկրորդ համաշխարհային պատերազմի ավարտին՝ Նյուրնբերգյան դատավարությունից երկու ամիս անց, ոմանք գային և ասեին՝ խնդրում ենք ազատ արձակել մահվան դատապարտված նացիստ առաջնորդներին։ Դա նույն բանն է, նույնիսկ ավելի վատ։ Նրանց հանցանքներն ավելի ծանր են, քան այն, ինչ արել են նացիստները Երկրորդ համաշխարհային պատերազմի ժամանակ»,– ասել էր Ալիևը։ Ադրբեջանի նախագահը չէր հերքել, որ ԱՄՆ փոխնախագահ Ջեյ Դի Վենսի հետ հանդիպման ընթացքում այս հարցը բարձրացվել է, սակայն Ադրբեջանի դիրքորոշումը չի փոխվել։

ԱՄՆ փոխնախագահի այցը ՀՀ իշխանությունները օգտագործել էին հերթական PR-ակցիայի համար՝ հայտարարելով, թե քննարկել են գերիների հարցը Վենսի հետ, վերջինս էլ «Զվարթնոց» օդանավակայանում՝ Բաքու մեկնելուց առաջ, խոստացել էր բարձրացնել հարցը։ Պարզվեց՝ ապարդյուն։ Բաքուն որևէ ցանկություն չունի ազատել գերիներին։ Առնվազն Արցախի ռազմաքաղաքական ղեկավարության ներկայացուցիչներին պատժելու է ամբողջ ուժով՝ ահաբեկելու ՀՀ քաղաքացիներին։ Իսկ Փաշինյանն ու իր թիմը, որոնք 2021 թ. քարոզարշավի ժամանակ հայտարարում էին, թե գերիները կսպասեն, այժմ՝ հինգ տարի անց էլ, հարցը միայն օգտագործում են սեփական նեղ կուսակցական կարիքների համար։

Սոնա Գալստյան