«Երաժշտություն հանուն ապագայի» հիմնադրամի «Հայ Վիրտուոզներ» ծրագրի կրթաթոշակառու Էդուարդ Դայանը արժանացել է Գրան Պրիի

Օրերս Ռուսաստանի Դաշնության Օմսկ քաղաքում անցկացվել է Վիլհելմ Շպետի անվան լարային-աղեղնային գործիքների կատարողների 3-րդ միջտարածաշրջանային բաց մրցույթը: Այն անցկացվել է «Ջութակ», «Ալտ», «Թավջութակ» անվանակարգերում: Ավելի քան 200 երիտասարդ երաժիշտ տարբեր քաղաքներից մասնակցել են հեղինակավոր մրցույթին, որը ևս մեկ քայլ է ապահովելու մասնագիտական շարունակական զարգացումը և ստեղծագործական աճը

Մրցույթի «Ջութակ» անվանակարգում հանդես է եկել «Երաժշտություն հանուն ապագայի» հիմնադրամի «Հայ Վիրտուոզներ» ծրագրի կրթաթոշակառու, ջութակահար Էդուարդ Դայանը։ Նա նվաճել է մրցույթի առաջին մրցանակը և Գրան Պրին, ինչպես նաև արժանացել է 1 միլիոն ռուբլի դրամական պարգևի։

Գալա համերգի ընթացքում Էդուարդ Դայանը կատարել է Նիկոլո Պագանինիի Ջութակի թիվ 1 կոնցերտը՝ Օմսկի ֆիլհարմոնիկ նվագախմբի նվագակցությամբ և դիրիժոր Միխայիլ Գոլիկովի ղեկավարությամբ։

Էդուարդ Դայանը ներկայում ուսումը շարունակում է «Զախար Բրոնի» ակադեմիայում (Շվեյցարիա)։

«Հայ Վիրտուոզներ» ծրագրի կրթաթոշակառուները շարունակում են իրենց հաղթարշավը տարբեր մրցույթների ժամանակ։ Նրանք իրենց հաջողություններով ապացուցում են, որ «Երաժշտություն հանուն ապագայի» հիմնադրամի՝ պատանի երաժիշտների մեջ տարիներ ի վեր ներդրած ջանքերը ժամանակի ընթացքում տալիս են իրենց պտուղները, այն է՝ կրթաթոշակառուների ստեղծագործական ու մասնագիտական աճ ու զարգացում և միջազգային տարբեր հարթակներում Հայաստանի Հանրապետության հանրահռչակում։