Ինչո՞ւ ԵՄ-ն չի պահանջում Ադրբեջանից ազատել ՀՀ օկուպացված տարածքները․ խնդիրը Հայաստանի իշխանությունների վարած քաղաքականության մեջ է. Էդմոն Մարուքյան

Էդմոն Մարուքյանը տելեգրամյան իր ալիքում գրում է.

Եվրոպական միության արտաքին գործերի և անվտանգության քաղաքականության հարցերով բարձր ներկայացուցիչ  Կայա Կալասը հայտարարել է, որ՝ ԵՄ պատրաստել է փաստաթուղթ, որը ներառում է Ռուսաստանին ներկայացվող պահանջներ՝ Ուկրաինայում հնարավոր խաղաղության համաձայնագրի շրջանակում։

«Ռուսաստանը օկուպացրել է բազմաթիվ տարածքներ, և նրա զորքերը տեղակայված են տարբեր երկրներում՝ լինի դա Վրաստանում, թե Մոլդովայում։ Ուստի երկարաժամկետ խաղաղության համար պետք է հստակ լինի, որ նրանք պարտավոր են դուրս բերել իրենց զորքերը բոլոր այն օկուպացված տարածքներից, որտեղ ներկայումս գտնվում են», — հայտարարել է Կալասը։

Գուցե հարցնեք, թե ինչու՞ Եվրոպական միության արտաքին գործերի և անվտանգության քաղաքականության բարձր ներկայացուցիչը նույնիսկ հարմար առիթների դեպքում չի հիշատակում, որ Ադրբեջանը արդեն մի քանի տարի է օկուպացված է պահում Հայաստանի ինքնիշխան տարածքները։ Հատկապես, որ այս հարցը ծագել է ոչ վաղ անցյալում՝ ի տարբերություն Վրաստանի և Մոլդովայի խնդիրների։

Սրա պատասխանը առավել քան ակնհայտ է․
միջազգային հարթակներում Հայաստանը չի բարձրացնում այդ հարցը, իսկ միջազգային գործընկերներին ներկայացվում է, թե մեր և մեր տարածքները օկուպացրած պետության միջև որևէ խնդիր չկա։

Սակայն իրականում Ադրբեջանի հետ հարաբերություններում մենք շարունակաբար միայն զիջում ենք և կորցնում։