Թոշակների բարձրացումը ընտրակաշառքի տրամաբանության մեջ է, բայց թոշակառուն հիմա էլ չի ընտրելու ՔՊ-ին

Թոշակների բարձրացումը ընտրակաշառքի տրամաբանության մեջ է, բայց թոշակառուն հիմա էլ չի ընտրելու ՔՊ-ին։ Այս մասին կառավարության շենքի մոտ լրագրողների հետ զրույցում ասաց «ՀայաՔվե» ազգային-քաղաքացիական միավորման համակարգող Ավետիք Չալաբյանը։

Հիշեցնենք՝ ապրիլի 1-ից կենսաթոշակներն ու նպաստները կբարձրանան մինչև 10 000 դրամով։ Հիմնական կենսաթոշակը 24 000-ից կդառնա 34 000 դրամ, նվազագույնը՝ 36 000-ից 46 000 դրամ։ Կբարձրանա նաև ծերության նպաստը։ 10 000 դրամով կավելանան հաշմանդամության նպաստները․ 36 000, 37 500 և 39 000 դրամի փոխարեն դրանք կկազմեն 46 000, 47 500 և 49 000 դրամ։

«Մեր կողմից այս հարցի վերաբերյալ բարձրաձայնումը գործող կառավարության ներկայացուցիչները անվանել են պոպուլիզմ, իրենց դեմ հիբրիդային պատերազմ, ինչը ծաղրելի է, հայտարարել են, որ կենսաթոշակները բարձրացնելու իմաստ չկա։ Եվ փառք Աստծո, որ այդ անհեթեթ կուրսը, որը որդեգրել էին, վերջապես եկավ իր տրամաբանական ավարտին՝ ընդունելով այն ամենը, ինչը բոլորիս համար ակնհայտ էր»,- ասաց նա։

Չալաբյանը նշեց սակայն, որ այս քայլը ոչ միայն ուշացած է, այլ նաև բացարձակ կիսատ-պռատ։ «Հիշեցնեմ՝ մենք պահանջում էինք, որպեսզի կենսաթոշակները բարձրանային առնվազ 50 տոկոսով, որը նույնիսկ բավարար չէր լինի»,- ընդգծեց նա։

Մանրամասները՝ տեսանյութում։