Նարեկ Կարապետյանը ներկայացրել է, թե ինչպես են մտադիր նվազեցնել դեղերի գները Հայաստանում

«Ուժեղ Հայաստան» կուսակցության համակարգող Նարեկ Կարապետյանը կուսակցության ֆեյսբուքյան էջում ուղիղ միացումով ներկայացրել է իր քաղաքական ուժի տնտեսական տնտեսական ծրագրի երրորդ կետը՝ «20%-ով ավելի էժան դեղորայք մեր հայրենակիցների համար»։

Նա նշել է, որ հարցումների համաձայն Հայաստանի ամեն հինգերորդ բնակիչն աղքատ է, և երբ նա դեղի կարիք է ունենում, կանգնում է ընտրության առաջ․ գնել դեղ, թե՝ հաց։ Ուսումնասիրությունները ցույց են տվել, որ Հայաստանում դեղերը մոտ երկու անգամ թանկ են քան Վրաստանում, Ռուսաստանում և անգամ եվրոպական երկրներում։ «Ուժեղ Հայաստանը» վերհանել է դրա պատճառները և նախանշել խնդրի լուծման ուղիները․

1․ Հայաստանում գրանցված է ընդամենը 3800 անվանում դեղ, երբ որ Վրաստանում այդ թիվը 8000 է։ Դա պայմանավորված է դեղերի գրանցման արհեստականորեն բարդացրած գործընթացով։ «Ուժեղ Հայաստան» կուսակցությունը իշխանության գալու պարագայում մտադիր է հեշտացնել դեղերի գրանցման գործընթացը։ Առաջարկվում է Եվրոպական միությունում և ԱՄՆ-ում գրանցված դեղերը ավտոմատ կերպով գրանցել Հայաստանում։ Գրանցված դեղերի քանակի ավելացումը կավելացնի մրցակցությունը և կբերի գների նվազման։ Դա կլուծի նաև դեղերի դեֆիցիտի խնդիրը հայկական շուկայում։

2․ Քանի որ Հայաստանը փոքր երկիր է, դեղ ներկրողները չեն կարողանում դեղերը գնել անմիջապես արտադրողներից, այլ ձեռք են բերում դրանք միջնորդ ընկերություններից, ավելի թանկ գներով։ Առաջարկվում է, որպեսզի կառավարությունը գին պայմանավորվի խոշոր արտադրողների հետ ամբողջ երկրի պահանջարկի համար, ինչը ևս կնվազեցնի դեղերի գները։

3․ Նարեկ Կարապետյանը հիշեցրել է, որ իրենց տնտեսական ծրագրի կարևոր կետերից մեկը տեղական արտադրության զարգացումն է, ներառյալ դեղերի արտադրությունը։ Դա, ըստ նրա, ևս կնվազեցնի դեղերի գները հայկական շուկայում։

«Ուժեղ Հայաստան» կուսակցության համակարգողը նշել է, որ իրենք ծրագրում են շարունակել առողջության ապահովագրության ներդրումը Հայաստանում, լավարկելով այն։

Մանրամասները՝ տեսանյութում։