ՔՊ-ական կեղծ դպիրի ձեռամբ ընտրություններից առաջ կարող է խափանվել 24News-ի ու այլ ԶԼՄ-ների աշխատանքը

Հանրության կողմից «ՔՊ-ի կեղծ դպիր» անվանումը ստացած անձնավորությունը՝ Ռաֆայել Արմենի Ջուլհակյանը, դիմել է Երևանի քաղաքի առաջին ատյանի ընդհանուր իրավասության քաղաքացիական դատարան և մի շարք լրատվամիջոցների վերաբերյալ հայցադիմում ներկայացրել՝ պահանջելով 21 մլն դրամ։

Վերոնշյալ անձնավորության կողմից 24News լրատվական ծառայության կայքին ուղարկված տեղեկատվության համաձայն, իբր, 7 լրատվամիջոց «տարածել են իր անձին վերաբերող իրականությանը չհամապատասխանող, զրպարտչական և վիրավորական բնույթի տեղեկություններ, որոնք արատավորում են իմ պատիվը, արժանապատվությունը և գործարար համբավը»՝ օգտագործելով «ֆեյք դպիր» և «կեղծ դպիր» ձևակերպումները։

Հիշյալ անձը խնդրում է դատարանին 7 պարտավորություն սահմանել պատասխանողների համար, այդ թվում նաև՝ «պատասխանողներից համապարտ կարգով բռնագանձել բարոյական վնասի փոխհատուցում՝ 21,000,000 (քսանմեկ միլիոն) ՀՀ դրամի չափով։»։

Ընդգծենք նաև, որ նույն անձը խնդրում է դատարանին նաև պատասխանող բոլոր ՍՊԸ‑ների նկատմամբ կիրառել կալանքի/արգելանքի միջոց՝ բոլոր գույքային և դրամական միջոցների վրա, ինչպես նաև՝ դատական նիստը դռնփակ անցկացնել։

24News-ն ակնհայտորեն միտում է տեսնում, որ իշխող ՔՊ-ի կողմից հովանավորություն վայելող այս անձնավորությունը պահանջում է ընտրությունների դիմաց սառեցնել առաջատար լրատվամիջոցների հաշիվները, ինչը, բնականաբար, անհաղթահարելի խոչընդոտներ կարող է ստեղծել ԶԼՄ գործունեության համար այս ժամանակաշրջանում։

Նշված գործընթացի մանրամասների վերաբերյալ 24News-ը առաջիկայում կներկայացնի լրացուցիչ տեղեկատվություն։